banner 1000x250

Indultu Emilia Pires-Madalena Hanjam, FRETILIN Konsidera PR Horta la Kontribui ba Luta Kontra Korrupsaun

  • Share
banner 728x90

DILI, www.news-viptv.com – Dezisaun Prezidenti Republika (PR) Jose Ramos-Horta ne’ebe fo indultu ba kondenada kazu korrupsaun Emilia Pires ho Madalena Hanjam tuir Bankada FRETILIN, Xefi Estadu la kontribui ona ba luta kontra korrupsaun iha Timor-Leste.

“Bankada FRETILIN afirma katak, dezisaun Prezidente Repúblika nian la kontribui ba luta kontra korrupsaun no la kontribui ba fortalesimentu sistema judisiariu, liu-liu Tribunal,” deklara Deputadu FRETILIN, Florentino da Costa “Sinarai” iha video konferensia imprensa Bankada FRETILIN nian ne’ebe redasaun asessu, Sexta (15/12/2023).

banner 1000x250

Sinarai esklarese, laos deit hafraku sistema judisiariu iha Timor-Leste, dezisaun PR Ramos-Horta ne’e mos  ignora sentidu justisa povu ida nian, hafraku sistema justisa iha Timor-Leste no Tribunal no Ministeriu Públiku nia kñar, no hamate ona justisa iha Timor-Leste ne’ebé perigu ba konstrusaun no konsolidasaun Estadu de Direitu Demokrátiku.

“Bankada Parlamentar FRETILIN lamenta ba desizaun Prezidente Republika hodi promulga Lei Konsesaun Indultu no Komutasaun Pena foun ne’ebé loke dalan atu fó indultu ba kondenada Eis Ministra Finansas Emilia Pires ho Eis Vice Ministra Saúde Madalena Hanjam relasiona ho kazu korrupsaun ne’ebé mak sira komete iha IV Governu Konstitusionál, iha loron 14 Dezembru 2023, Prezidente José Ramos Horta, liu husi dekretu Prezidente númeru 125/2023 iha selebrasaun Natal Tinan ida ne’e,” dehan Sinarai.

Nia hatutan, Tribunal Rekursu konfirma desizaun Tribunal Primeira Instansia hodi kondena Eis Ministra Finansas Emilia Pires tinan hitu (7) prizaun no Eis Vice Ministra Saúde Madalena Hanjam tinan hat (4) prizaun ho pena suspensa, relasiona ho krimi korrupsaun partisipasaun ekonómiku ba projetu fornesementu kama ba Óspital Nasionál Guido Valadares.

“Bankada FRETILIN lamenta desizaun Prezidente Repúblika José Ramos Horta nian, hodi fó indultu ka perdaun ba kondenada kazu korupsaun, liu liu fó indultu ba kondenada ida ne’ebé seidauk kumpri nia pena iha prizaun,” nia dehan.

Bankada FRETILIN hare katak desizaun Prezidente promulga lei ida ne’e, no hahu kedas fó indultu ba kondenada ne’ebé seidauk kumpre pena, hanesan tentativa makas ba prosesu atu hamate sistema justisa, hafraku autoridade no kompetensia orgaun soberanu Tribunal nian no fó prejuizu ba Estadu no Povu tomak nia diak, inklui kria presedensia ladiak ba futuru Justisa iha Estadu de Direitu Demokrátiku.

Sinarai mos hateten, bainhira Deputadu Bankada CNRT nain 30 hamosu inisiativa projetu lei indultu no komutasaun de pena hodi altera lei númeru 5/2016 ne’e rasik, Bankada FRETILIN iha momentu ne’e kedas, kontra totál tanba lei ne’e hanesan atu promove branqueamento krime sira iha Timor-Leste, ho objetivu atu fase krimi hot-hotu hanesan korrupsaun, krime kontra integridadi umana (omisidiu, violasaun no seluk tan), krime kontra terrorismu, krimi kontra humanidade, krimi kontra Estadu ne’ebé fó perigu ba Estadu no Povu tomak.

Bankada FRETILIN vota kontra tanba lei ne’e kontra prinsípiu Justisa no Estadu Direitu Demokratiku, no sei motiva ou bele hamosu krime oi-oin iha Timor-Leste no fó biban ba ema sira ne’ebé okupa kargu polítiku hodi livre husi krimi ne’ebé sira komete.

Hosi Indultu rua ne’ebe fó sai iha loron hanesan ho loron ne’ebé Presidente promulga no halo públikasaun lei foun ba Konsesaun Indulto no Komutasaun Pena ne’ebé Bankada Governu sira uza maioria atu aprova, FRETILIN preokupa katak sei kontribui makas ba falta konfiansa hosi sosiedade ba Instituisaun Judisiariu sira no sistema justisa no dekretu prezidente horseik nia hanesan pasu dahuluk atu loke para tuir mai fó indultu mós ba kondenadu seluk tan ne’ebé komete krime kontra sidadaun no Estado Timor-Leste.

Deputadu FRETILIN, Antoninho Bianco.

Iha fatin hanesan deputadu Antoninho Bianco konsidera atribuisaun indultu ne’ebe PR Ramos-Horta fo ba Emilia Pires ho Madalena Hanjam la tuir regras ne’ebe iha.

“Iha parte ne’e tamba Prezidenti Republika uza deit nia kompetensia absuluta atu fo deit indultu no komutasaun pena, liliu ba sira nebe iha prosesu hela no sedauk tama tan kadeia. Entaun, ema nia prosesu ida ne’e ita bele dehan Prezidenti Republika halo fali tribunal mesak, prosesu tribunal nian sei lao hela, prosesu judisial sei lao hela, ema ne’e rasik la tama kadeia, balun halai tan ba rai seluk, no iha ne’e bele hateten problema estadu, Prezidenti Republika nia dezisaun kria problema ba estadu, bele akontese ba oin,” hateten Antoninho Bianco.

Indultu ne’ebe fo ba Emilia Pires no Madalena Hanjam sita iha Dekretu Prezidente Repúblika númeru 125/2023, loron 14  Dezembru kona-bá Concessão de indulto por ocasião da Quadra Natal do ano 2023.

  • Share

Leave a Reply

Your email address will not be published. Required fields are marked *

error: Content is protected !!