IFC Kontinua Komitmentu ba Kontribuisaun ba Dezemvolvimentu TL

Dili, www.news-viptv.com – International Finance Corporation (IFC) nu’udar membru hosi grupu Banku Mundial kontinua hatudu sira nia komitmentu hodi kontribuisaun nafatin ba dezemvolvimentu Timor-Leste (TL).

Country Manager IFC ba Indonesia no TL, Euan Marshall iha nia hasoru malu ho Prezidenti Republika José Ramos-Horta mos louva ba progressu dezemvolvimentu Timor-Leste iha periodu tinan 20.

Ho nia knar foun refere, Euan Marshall pronto atu hamutuk ho entidade Timor-Leste hodi hamutuk halo dezemvolvimentu iha Timor-Leste.

“Objetivu enkontru ho Prezidente Republika mak deskute oinsa IFC bele hasae ninia kontribuisaun ba Dezenvolvimentu iha Timor Leste, alende atu deskute oinsa IFC nu’udar membru grupu banku mundial bele mos kontribui ba Dezenvolvimentu iha Timor,” dehan Euan Marshall ba jornalista sira hafoin hasoru malu PR Ramos-Horta, Kuarta (29/11/2023), iha Palasiu Prezidensial, Dili.

Ho interese investor hosi rai liur, Euan Marshall hare katak pozitivu teb-tebes ba Timor-Leste no IFC nuudar ajensia finanseiru neebe foka ba Dezenvolvimentu setor privado mos intrese tebes konaba posiblidade ba investimentu iha Timor iha future.

Nia mos konfirma kompromisu IFC nian atu fasilita oportunidade foun sira iha setór privadu Timor Leste nian liuhosi serbisu asesória no akordu finansiamentu sira ne’ebé dezeña atu estimula investimentu sustentável longu prazu. Parte rua sira nia objetivu mak atu dezenvolve planu kolaborasaun konkretu liu iha fulan hirak tuir mai.

Iha reuniaun, foka ba vizaun Prezidente Ramos-Horta nia atu uza investimentu husi korporasaun no instituisaun finanseiru globál sira atu empursa kresimentu ekonómiku no kriasaun empregu iha rai laran tomak.