IET Maranatha no IEAD Belnaz Kraik Konsagra Estrutura Foun

BIQUELI, www.news-viptv.com – Hodi haforsa no hametin obra Maromak nian iha Timor-Leste, Konsellu Pastoral Igreja Evangelica Trindade Maranatha Dili no Igreja Evangelica Assembleia de Deus Belem Nazare Kraik konsagra estrutura foun ba igreja rua refere, Segunda (2/1/2023), iha Igreja Belnaz Kraik, Biqueli, Munisipiu Atauro.

Iha konsagrasaun ne´e, Konsellu Pastoral Igreja Evangelica Maranatha Dili, hili Pastor Samuel Belo nudar Maromak Atan ba igreja refere no Pastor Naor Soares nudar Maromak Atan ba Igreja Evangelica Assembleia de Deus Belnaz Kraik.

Pastor Samuel Belo wainhira simu konsagraasaun nudar Maromak atan ba Igreja Evangelica Trindade Maranatha Dili ne´ebe realiza iha Igreja IEAD Belem Nazare (Belnaz) Kraik, Biqueli, Munisipiu Atauro. Photo: VIPTV/Pedro Correia

Ba VIP TV, Pastor Jemaiah Gomes ne´ebe hetan konsagrasaun nudar sekretaria Igreja Evangelica Assembleia de Deus Belnaz Kraik sente haksolok bele hola parte iha ministeriu Maromak nian.

Konsagrasaun ne´e hetan partisipasaun hosi familia Maromak atan sira no estrutura tomak ho povu sarani Igreja rua refere.

Alende realiza konsagrasaun, igreja rua mos halo natal konjunta no tinan foun ho sarani no komunidade Biqueli hodi hanoin hikas Nai Jesus Kristu nia moris hodi sai salvador ba Nia kriatura sira no halo orasaun hamutuk hodi simu tinan foun ho grasa Maromak nian.

Iha enseramentu atividade tomak igreja rua ne´emos hetan prezensa hosi reprezentante F-FDTL no PNTL ne´ebe halao knar iha Munisipiu Atauro.