Hasa’e Kresimentu Ekonomia TL, CCI-TL Halo Akordu Koperasaun ho KADIN Indonesia

DILI, www.news-viptv.com – Camara Comercio Industria Timor-Leste (CCI-TL) halo ona akordu kooperasaun ho Kamar Dagang Industri (KADIN) Indonesia ho objetivu hodi hasa’e kresimentu ekonomia iha Timor-Leste.

Ho objetivu refere, Prezidenti Republika (PR) Jose Ramos-Horta iha Sexta (20/12/2024) simu vizita delegasaun KADIN ne’ebe lidera husi Prezidente M. Arsjad Rasjid P. M. hamutuk ho reprezentante sira husi Kámara Komérsiu no Indústria Timor-Leste nian (CCI-TL ), ne’ebé lidera husi Jorge Manuel de Araújo Serrano, iha Palásiu Prezidensiál.

Prezidente CCI-TL Jorge Serrano esplika akordu foun ne’e abranje setór oioin, inklui agrikultura, peska, pekuária, no dezenvolvimentu negósiu ki’ik.

“Ita mós presija hare iha realidade iha timor ,sira nasaun boot no emprezariu barak ona ,sira produs buat barak ona no ita buka aprende buat balu atu nune’e tuir ita nia realidade ne’ebé iha,” hateten Jorge Serrano ba jornalista sira.

Delegasaun Indonézia mós fahe sira-nia inisiativa ambisioza hanaran “Movimentu 08”, ho alvu 0% pobreza no kresimentu ekonómiku 8%, enkuantu aprezenta roteiru Indonézia nian atu sai lideransa ekonomia dahaat iha mundu iha tinan 2045. Parte rua subliña katak pás no prosperidade sai nafatin objetivu fundamentál hosi sira-nia parseria, ho foku ida atu asegura dezenvolvimentu ekuitativu iha nasaun rua.

Kooperasaun ne’ebé hametin entre kámara komérsiu rua ne’e aliña ho Timor-Leste nia adezaun ba ASEAN, harii iha projetu kolaborativu sira ne’ebé eziste ona antes nasaun ne’e tama iha bloku rejionál. Parseria ne’ebé habelar ona ne’e hatudu relasaun ekonómiku ne’ebé buras entre Indonézia no Timor-Leste, hodi haburas kreximentu mútuo no estabilidade rejionál liuhosi hasa’e relasaun entre negósiu ho negósiu.