Hapara Hoax, SECOMS Sei Aprezenta Lei Cybernetika ba PN

DILI, www.news-viptv.com – Atu regula utilizasaun internet no evita ID Falsu ba lansa informasaun falsu ka Hoax, Sekretaria Estadu Komunikasaun Sosial (SECOMS) iha tempu badak sei aprezenta Lei Cybernetika ba iha Parlamentu Nasional.

Sekretariu Estadu Komunikasaun Sosial, Expedito Dias Ximenes esplika katak, Lei Cybernetika ne’e importante hodi regula ema hirak ne’ebe utiliza internet ho responsabilidade.

“Iha tempu badak mos ami sei hato’o ba iha Parlamento Nasional hodi halo Lei cybernetika hodi regula ita atu uza internet ne’ebe uza ita nia ID rasik hodi hapara Hoax,” hateten Expedito ba jornalista sira hafoin simu reprezentante UNICEF iha nia knar fatin, Tersa (08/8/2023) iha Palacio do Governo, Dili.

Tamba, IX Governu Konstitusional iha politika komunikasaun social sei kontinua programa hosi governu anterior ba kombate hoax hodi fo hanoin nafatin ba publiku, liliu utilizador internet atu kontra hasoru hoax.

Iha nia inkontru ho reprezentante UNICEF, membru governu ne’e esplika iha pontu rua importante ne’ebe sira koalia maka SECOMS ho UNICEF sei servisu hamutuk hodi fo direitu ba labarik foin sae sira uza internet.

“Segundu maka oinsa UNICEF bele uza plataforma governo nian hanesan RTTL no media sira seluk hodi ba realizasaun atividade,” dehan sekretariu estadu.

Iha era globalisasaun, Expedito esplika, joven barak maka uza internet la tuir dalan, ne’ebe dala barak internet  fo pontu positivu, maibe hamosu mos pontu negativu ba labarik foin sa’e sira.

“Ho razaun hirak ne’e maka UNICEF hakarak servisu hamutuk ho SECOMS hodi evita hahalok negativu ne’ebe afeta husi internet,” dehan Expedito.

Iha parte ida, SECOMS mos husu ba UNICEF hodi hare’e oinsa para bele motiva foinsa’e sira atu kontinua nafatin utiliza internet ba edukasaun.

“Ita hotu hatene katak teknologia avansadu los no suporta joven estudante sira hodi asesu ba edukasaun liu husi internet maibe dalaruma mos hapara estudante sira nia vontade estuda,” nia dehan.

Ho pontu ne’e, SECOMS aseita ho UNICEF nia hanoin katak sira sei fo treinamento ba estudante no joven sira oinsa atu utiliza internet ne’ebe diak no fo vantajen ba futuru hodi hapara hahalok negativu sira iha media sosial.