Governu Aprezenta Proposta Lei Orsamentu Retifikativu 2023, * Sei Halakon ANAPMA, ANAS, I.P ho ANE, I.P  

DILI, www.news-viptv.com – IX Governu Konstitusional lideradu hosi Primeiru Ministru (PM) Xanana Gusmão aprezenta proposta Lei Orsamentu Retifikativu 2023 ba Parlamentu Nasional, Tersa (22/8/2023).

“Ho proposta ba Lei de Orçamento Retificativo ida ne’e, despesa total mak sai ho ninia valor total consolidado ba 1.771.867.112 dólares americanos, nebé hetan financiamento husi receitas domésticas, husi Rendimento Sustentável Estimado no husi levantamentos liu RSE né. Nune’e, ami reduz mós montante ba transferência autorizada husi Fundo Petrolífero, nebé hamenus husi 1.346.090.000 dólares americanos ba 1.208.194.889 dólares americanos,” dehan PM Xanana iha nia deskursu.

Iha aprezentasaun proposta lei orsamentu retifikativu ne’e, Governu mos hare ba ejistensia institutus publikus ne’ebe hari’i hosi governu anterior hodi hatama deit membru partidos sira no laiha rasionalidade administrativa ou ekonomia, Governu sei halakon Agência Nacional de Planeamento, Monitorização e Avaliação (ANAPMA), hanesan mós Autoridade Nacional para a Água e Saneamento (ANAS, I.P.) no Autoridade Nacional para a Eletricidade (ANE, I.P.).

“Relasiona mós ho ida ne’e, ha’u tenki esklarese katak IX Governo sei hahú ninia polítika kona-ba redusaun iha Institutos Públicos, nebé kria husi anterior governasaun, nebé sai deit dalan atu hatama membros dos partidos, no la iha liu rasionalidade administrativa ou ekonómika,” dehan  dehan PM Xanana Gusmão.

Alende deklara ona atu halakon ANAPMA, ANAS, I.P ho ANE, I.P, iha nia deskursu, PM Xanana mos triste tanba, sistema finanseiru nebé uluk iha, harí kedas iha tempu IV Governu Konstitusional, hodi instituições finanseiras internasionais mós fó apresu tebes no husu atu reforsa di’ak liu tan, sistema finanseiru ne’e hetan mudansas barak, nune’e viola prinsípiu jestaun finansas públicas nebé di’ak estraga tiha de’it.

“Durante semana ida nia laran, ha’u bele constata rasik, violasoens nebé akontese durante tinan 5 nia laran, nebé mosu tanba desvios husi alterasaun nebé halo iha Sistema Finanseiru nasional. Iha liur, ha’u sempre hakfodak ho Bilioens de dólares nebé hatama iha Orçamento Geral do Estado, tinan-tinan. Povo rasik mós rona no tanba la haré resultado nebé bele hatudu katak sira bele iha esperança atu, loron ikus mai, hadi’a sira nia moris, mak Povo decide atu hili IX Governo Constitucional,” dehan xefi governu ne’e.

PM Xanana mos esklarese tamba sa IX Governu Konstitusional lori Orsamentu Retifikativu ida ne’e, ho alterações oi-oin. Maka 1- Portal de Transparência ladún apresenta informasaun kompleta kona-ba orsamentu no planeamento no, dala barak, ladún funsiona;

2 – Halakon tiha princípio ‘Orçamento por Programa’, hodi hamosu ‘Grandes Opções de Plano’, hodi ninia implementação la tuir princípio‘Orçamento por Programa’, nune’e, permite instituições hotu-hotu halo arbiru de’it no halo fali buat nebé la ós sira-nia competência; 3 – Princípio ‘Anualidade’ do Orçamento, nebé regula despesas to’o de’it 31 de Dezembro cada tinan, la vale tiha, hodi fó fatin ba ‘moras’ foun ida ho naran ‘Receitas’ ba Instituisoens sira, hodi la bolu ona Saldo de Gerência, nebé lolós fila ba Cofre do Estado;

4 – Princípio nebé regula Transferência osan, husi Categoria ida ba categoria seluk, halakon tiha, hodi permite Ministérios no Instituições sira bele halo ‘Viroment’ arbiru deit, husi ‘Salários’ ba ‘Bens e Serviços’ no ba ‘Capital Menor’, no husi ‘Capital Menor’ ba fali ‘Salários no Vencimentos’;

“5 – Princípio Transparência só bele mosu husi prática, iha nebé Instituição ida depende ba Instituição seluk, hodi bele exige buat hotu tuir normas no regras nebé hatúr tiha ona iha Sistema – maibé, halakon tiha poder husi CNA no ADN, no projetos barak, nebé fó deit, la tuir ona Aprovisionamento ka Tenderização, hodi agora labele iha dados nebé lós kona-ba kusto projeto ida-idak nebé la’o tiha ona no la’o hela,” dehan PM Xanana.

Nia hatutan, “6 – Ho ne’e hotu, maka IX Governo Constitucional decide ona atu hapára tiha contratos sira nebé anterior Governo assina, iha ona final do mandato, no, liuliu, tanba haré katak la iha liu estudos de análise profunda kona-ba custos lolós ba projetos sira né, nebé nia folin ás tebes, no la liu husi aprovisionamento. 7 – Tanba mosu ambiente hanesan ne’e, maka mosu mós violação ba Regras de Funcionalismo Público, nebé la haré ona ba mérito no experiência funcionários sira nian, hodi hasai arbiru no hatama fali ema sem nenhuma experiência; 8 – Tanba Comissão Função Pública nonok deit, maka mosu mós, iha ona tinan eleições, política hatama casuais rihun ba rihun, nebé la halo buat ida, tanba la iha buat ida ba sira atu halo.”

Factos sira née hotu, PM Xanana esplika, maka IX Governo buka hadi’a, hodi fila fali ba Normas uluk nian, ho Categorias Lima deit: – Salários e Vencimentos, Bens e Serviços, Capital Menor, Transferências Públicas e Capital de Desenvolvimento.

“Maibé maski hahú iha Orçamento Retifikativu ida ne’e, IX Governo sei kaer nafatin sub-programas nebé hala’o hela, tanba difícil tebes atu muda buat hotu- hotu agora kedas.

Só iha Tinan mai ne’e, 2024, liu husi OGE 202, mak ami sei bele hatúr fali Sistema Financeiro anterior, nebé di’ak tebes,” dehan PM Xanana.

Ba deputadu sira, xefi governu mos fo sai katak, iha aspeitu lima ne’ebe hamosu iha Orsamentu Retifikativu ida ne’e maka  Primeiro, atu viabiliza estrutura governamental foun, ho criação ka alteração iha Ministérios balun, tanba ne’e mak bele efetua ajustes balun iha títulos husi classificação orgânica ba Orçamento Geral do Estado tinan 2023.

“Ne’e inclui criação Ministério do Turismo e Ambiente, Ministério do Desenvolvimento Rural e Habitação Comunitária, Ministério da Juventude, Desporto, Arte e Cultura no Ministério do Planeamento e Investimento Estratégico, ne’ebé substitui Ministério do Plano e do Ordenamento,” PM Xanana esplika.

Pontu daruak maka hakarak kontensaun iha contas públicas, nune’e duni maka, analisa tiha execução orçamental to’o ohin loron, IX Governo Constitucional propõe redução ba despesa nebé prevista iha Orçamento Geral do Estado, nune’e mós ba montante husi transferência do Fundo Petrolífero.

Redução ne’e bele halo, tanba mai husi avaliação nebé hala’o tiha ona, hodi resulta ba identificação kona-ba poupanças iha serviços lubuk ida no entidades oi- oin iha Setor Público Administrativo. Revisão de despesas no gestão responsável, nebé bele corrije constantemente (ka, beibeik) desvios no gastos supérfluos, ne’e hotu la-ós deit método (ka, dalan di’ak ida), maibé sai nudar ‘Filosofia’ ba Governo ida ne’e.

“Terceiro, taxa de inflação nebé ás tebes iha Timor-Leste, maka provoca dificuldades barak liu ba condições de vida ita-nia povo nian, hodi castiga liu maka famílias nebé desfavorecidas. IX Governo compromete-an atu hamenus tiha pressão inflacionária ne’e no ami propõe, iha retificativo ida ne’e, atu reduz taxas de imposto seletivo ba consumo ba masin-midar no ba direitos aduaneiros de importação, nebé aplicáveis iha 2023,” xefi governu ne’e esklarese.

Pontu dahat, ne’ebe PM Xanana mos temi maka tamba boa governasaun impõe rigor no transparência, iha execução do Orçamento Geral do Estado no iha gestão das contas públicas, ami propõe alteração ba Lei n.º 2/2022, de 10 de fevereiro, kona-ba “Enquadramento do Orsamento Geral do Estado e da gestão financeira pública”, hodi nune’e permite katak Orçamento ba 2024 bele prepara ona, tuir novas regras, nebé hatúr.

Relaciona ho ida ne’e, hodi considera katak buat nebé temi hanesan ‘apresentação por programas’ iha Orçamentos de Estado desde tinan 2017, provoca tiha falta de controlo no falta de transparência iha contas públicas. Nune’e, gradualmente, ami sei fila ba organiza OGE iha categorias lima (salários e vencimentos, bens e serviços, transferências públicas, capital menor e capital de desenvolvimento), hodi aumenta liu tan nível de detalhe, iha informação nebé sei apresenta mai Parlamento Nacional no aumenta liu tan ninia compreensão hodi fasilita futura fiscalização.

“Ha’u dehan gradualmente, tanba ita tenki hein ba OGE 2024 nian. Nune’e mós, atu garante maior estabilidade iha Orçamento Geral do Estado aprovado, ami sei elimina Lei das ‘Grandes Opções do Plano’, hodi cria Plano Anual de Investimento Estratégico, atu bele fó dalan ba visão plurianual do Orçamento, tuir melhores práticas internacionais. Alterações sira ne’e hotu maka sei garante sustentabilidade, rigor no transparência iha contas públicas,” dehan PM Xanana.

Pontu dalima nian maka Governu propõe alteração ba Lei n.º 8/2008, de 30 de junho, “Lei Tributária”, nebé hetan alteração husi Lei n.º 5/2019, de 27 de agosto, hodi nune’e bele mosu clarificação nebé lós no di’ak kona-ba conceito ba estabelecimento estável, nebé prevê iha Lei Tributária no, nune’e, hasai tiha dúvidas kona-ba regime tributário aplicável ba situações sira né, hodi fó liu tan maior segurança jurídica no estabilidade fiscal ba investimento estrangeiro iha Timor-Leste.

“Ho proposta ba Lei de Orçamento Retificativo ida ne’e, despesa total mak sai ho ninia valor total consolidado ba 1.771.867.112 dólares americanos, nebé hetan financiamento husi receitas domésticas, husi Rendimento Sustentável Estimado no husi levantamentos liu RSE né. Nune’e, ami reduz mós montante ba transferência autorizada husi Fundo Petrolífero, nebé hamenus husi 1.346.090.000 dólares americanos ba 1.208.194.889 dólares americanos,” nia dehan.

Administração central hetan despesa estimada ho valor de 1.633.000.000 dólares americanos. Segurança Social, la conta ho Fundo de Reserva da Segurança Social, sa’e ba montante de 130.965.306 dólares americanos (husi valor total consolidado né, sei la tama montante de 75.860.306 dólares americanos da Segurança Social, nebé mai husi transferências da administração central, atu evita ninia contagem em duplicado – ka, dala rua). Região Administrativa Especial de Oe-Cusse Ambeno (RAEOA) hetan valor estimado de 83.762.112 dólares americanos.

Husi ponto de vista técnico, Xefi Governu husu ba deputadu/a sira bele haré alterações ba estrutura iha tabelas do Orçamento Geral do Estado, alterações sira ne’e ho objetivo atu hetan maior transparência no compreensão di’ak liu ba informação. Liuliu, tabelas I no II do Orçamento Geral do Estado, hatudu mós liu receitas no despesas sá-ida mak financiadas husi Administração Central, inclui transferências da Administração Central ba Orçamento da Segurança Social no ba Orçamento da Região Administrativa Especial de Oe-Cusse Ambeno, no sira seluk nebé financiadas husi receitas próprias iha subsetores ida-idak nian, no, nune’e, la fó todan ba Administração Central nem ba Fundo Petrolífero.

“Total ne’e ami apresenta iha oin tolu, ‘com e sem’ receita no despesa do Fundo de Reserva da Segurança Social no total consolidado, atu bele sai claro liu tan, despesa lolós nebé sei hala’o iha tinan ida ne’e, la halo duplikasaun, no mós despesa nebé la efetiva, tanba investe husi Fundo de Reserva ne’e,” nia dehan.

Husi sikun seluk, tabelas V no VI, VIII no IX, XI no XII sei apresenta ka hamosu, hanesan parte ida husi classificação económica, ho ona categorias 5 foun nebé referidas tiha ona, hodi categorias 19 uluk nian ba fali subcategorias, de segundo nível, hodi aumenta, nune’e, nível de detalhe ba informação nebé ami apresenta ba Parlamento Nacional.

IX Governo Constitucional comprometido tebe-tebes ho política fiscal ida nebé sei lori ba desenvolvimento económico do país, no sei administra ita-nia gastos no receitas, ho forma nebé escrupulosa no eficiente, hodi promove fali confiança, la-ós deit husi ita-nia cidadãos, maibé mós husi investidores.

“Ami fiar katak, ho aprovação proposta de Lei de Orçamento Retificativo ida ne’e, no mós ba alterações iha Leis nebé referidas, bele ona la-ós deit garante execução orçamental ba 2023 nebé boot liu no di’ak liu, hodi combate inflação nebé afeta daudauk condições de vida timoroan sira nian, nune’e mós atu hahú imediatamente preparação ba Orçamento Geral de Estado ba tinan 2024, nebé sei hatúr ona processo orçamental husi filosofia do IX Governo Constitucional,” dehan PM Xanana.

Aprovação Orçamento ida ne’e, esplika PM Xanana sei permite mós atu estrutura governamental foun bele cumpre ninia missão, liuliu iha implementação ba medidas comprometidas ba loron 120 mandato ne’e nian.