EBF-Tokoluli Simu Apoia Meza-Kadeira 40 Hosi ME

RAILAKU, www.news-viptv.com – Hodi fasilita prosesu aprendijazem iha Eskola Baziku Filial (EBF) Tokoluli, Ministeriu Edukasaun (ME) liu husi politika Nono Governu Konstitusional fo apoia ona meza-kadeira ba eskola refere hamutuk 40.

Meza-Kadeira 40 ne’e entrega dereta husi Sekretáriu Estadu ensinu Sekundáriu Jéral no Ensinu Tékniku Vokasionál Domingos Lopes Lemos no simu hosi Diretor EBF-Tokoluli Jacinto Madeira da Cruz, Segunda (16/9/2024), iha EBF Tokoluli, Postu Administrativu Railaku, Munisipiu Ermera.

Ba jornalista sira, Sekretraiu Estadu Domingos Lemos esplika apoiu meza-kadeira ne’e la’os proposta husi eskola sira, maibe ne’e polítika ministériu nian ba eskola sira iha teritoriu hotu bele hetan apoiu ne’e.

“Maioria eskola sei falta kadeira ho meza, nafatin ekipa sei kontinua halo monitorizasaun hodi buka hatene eskola sira ne’ebé presiza duni kadeira no meza hodi apoiu,” dehan Domingos Lemos.

Nia mos haktuir dau-daun Ministeriu sei loke espasu ba sala da aula iha eskola sira iha nivel teritoriu hodi estudante sira bele aprende ho diak.

Diretor EBF-Tokoluli, Jacinto Madeira da Cruz informa total estudante iha eskola ne’e hamutuk iha 403 husi Pre Eskolar no Pre Secundariu, no manorin iha nain 12.

Nia husu mos ba Ministeriu tenke apoiu mos material Deadiku ba Literiasia Pre-Eskolar sira nian.