Dezemvolve Munisipiu, Governu Aprova Planu Ordenamentu Teritoriu ba Baucau, Vikeke no Lautem

DILI, www.news-viptv.com – Hodi halo dezemvolvimentu ba teritoriu Timor-Leste tomak, Governu liu husi inkontru Konsellu Ministru aprova ona dekretu lei tolu ba Planus Munisipiu ba Ordenamentu Territoriu ba Baucau, Viqueque no Lautem.

Proposta planu ne’e aprezenta husi Ministru Planeamentu no Investimentu Estratéjiku, Gastão Francisco de Sousa, ne’ebe hetan aprovasaun iha Kuarta (12/3/2025).

“Planu sira-ne’e estabelese estratéjia dezenvolvimentu territoriál lokál, define polítika ordenamentu territoriál munisipál no urbanizmu no garante integrasaun polítika setoriál oioin ho impaktu ba territóriu munisipál,” hakerek komunikadu imprensa ne’ebe redasaun assesu.

Planus Munisipais ba Ordenamentu Territóriu nian hatudu, iha nivel lokál, matadalan sira ne’ebé estabelese ona iha instrumentus ba planeamentu estratéjiku nasionál, hodi asegura vizaun estruturadu ida ba kreximentu no dezenvolvimentu sustentável munisípiu ida-idak nian. Entre medidas prinsipais, inklui definisaun ba modelu ordenamentu territoriál munisípiu nian, regulamentu hosi okupasaun no utilizasaun rai no jestaun programada hosi espasu públiku, hodi permite planeamentu ida ne’ebé efisiente liu no adapta ba nesesidades lokais.

Iha inkontru ohin ne’e, Ministru Juventude, Desportu, Arte no Kultura, Nelyo Isaac Sarmento, aprezenta ba Konsellu Ministrus Relatóriu kona-ba atividades Artes Marsiais, iha ámbitu aplikasaun Rezolusaun Governu n. 60/2024, loron 7 fulan-novembru. Rezolusaun Governu ida-ne’e hanaruk suspensaun ba ensinu, aprendizajen no prátika artes marsiais no rituais iha territóriu nasionál tomak, ne’ebé inisialmente determina hosi Rezolusaun Governu n. 45/2023, loron 10 fulan-novembru, no tuirmai prorroga hosi Rezolusaun Governu n. 17/2024, loron 24 fulan-abríl, to’o loron 10 fulan-abríl tinan 2025.