Deskreve Extensaun Imunidade ho Vasina, Menzies Lansa Estudu Seroprevalensia

DILI, news-viptv.com – Menzies School of Health Research (Menzies) nudar Institu Estudu ba Peskiza Saude nian iha Australia lansa tan estudu seroprevalensia iha Timor-Leste.

Estudu seroprevalénsia nasional foun ida ne’e ho objetivu atu deskreve extensaun imunidade nian ba moras sira ne’ebé mak bele prevene ho vasina, inklui COVID-19, sarampo, rubella, hepatitis B no denge iha Timor-Leste.

“Vasinasaun ne’e hanesan estratejia ida ne’ebé mak importante tebes iha Timor-Leste, hodi proteje ema hasoru moras sira inklui COVID-19, sarampo, rubella no hepatitis B. Vasinasaun ne’e disponivel liu husi servisu saúde Governu nian iha Timor-Leste, maibe eziste variasaun substansial iha entendimentu vasina oin-oin ba iha munisípiu sira ne’ebé diferente,” hakerek komunikadu imprensa ne’ebe redasaun simu, Kuarta (6/10/2021).

Ekipa estudu sei halo vizita ba uma-kain ne’ebe hili ona aleatoriamente (secara acak), no sei konvida ema atu partisipa kuaze 5.000 ba leten, husi kada munisipiu iha Timor-Leste.

Estudu foun ida ne’e Menzies mak sei realiza liu husi nia projetu ARIA-RISE, parseria ho Ministériu Saúde Timor-Leste, Laboratóriu Nasional Saúde (LNS), no Sentru Nasionál Peskiza no Vijilánsia ba Imunizasaun (NCIRS), no finansia liu husi Governu Australia nia Departamentu Negósiu Estranjeiru no Komérsiu (DFAT).

Ekipa peskiza ba estudu seroprevalénsia nasionál ida ne’e, lidera husi Dr Nelson Martins (Investigadór Prinsipal, Menzies), aprezenta proposta peskiza nian hamutuk ho Dr Sarah Louise Sheridan (Co-Investigador, NCIRS) ba iha Komite Etika Teknikal no Peskiza nian iha Institutu Nasional Saúde (INS), Dili.

“Importante tebes atu hatene kona ba ema nain hira mak iha imunidade ba moras infesiozu sira ne’e iha Timor-Leste, atu bele fornese dadus ne’ebé mak bazeia ba evidénsia, hodi bele guia Ministériu Saúde nia politika no estratejia hodi kontrola no elimina moras hirak ne’e iha Timor-Leste,” dehan Menzies nia peskizadór Dr Nelson Martins.

Dr Sarah Sheridan, konkorda ho Dr Nelson, hateten katak rezultadu estudu ne’e provavelmente hodi reforsa Timor-Leste nia kapasidade atu efisientemente prevene surtu iha futuru husi moras sira hanesan sarampo no rubella liu husi permite kampaña vasinasaun ba iha populasaun sira ne’ebé mak seidauk simu imunizasaun.

Depois de transmisaun signifikante husi COVID-19 iha Timor laran tomak iha tinan 2021, determina proporsaun husi populasaun ne’ebe mak iha evidénsia imunidade hodi kontra COVID-19 tantu husi infesaun ou vasinasaun, ne’e sei ajuda planeamentu ba resposta saúde públika nian ne’ebé mak daudaun ne’e la’o hela.

“Estudu ida ne’e importante tebes liu-liu ba kazu COVID-19 nian iha Timor-Leste, no sei ajuda Sentru Integradu Jestaun Krize (SIJK) hodi kompriende prevalénsia husi COVID-19 iha Timor-Leste,” hateten Caetano Gusmão, Xefe Departamentu Peskiza iha INS.

Menzies servisu hamutuk ho Governu Timor-Leste no parseiru sira atu haforsa sistema saúde nian hodi responde ba dezafiu husi moras infesiozu sira.

Menzies nia projetu sira iha Timor-Leste ne’e projetadu atu hasa’e kapasidade iha área klinikal, vijilánsia no laboratóriu, subliña kona-ba importánsia husi sistema saúde nian hala’o servisu hamutuk hodi mellora resposta ba moras infesiozu sira, tantu ba iha pasiente individual no nível saúde públiku.