Caitlin Wilson Embaixadora Foun Australia ba Timor-Leste

DILI, www.news-viptv.com   – Governu Australia hili ona Caitlin Wilson nu’udar Embaixadóra Commonwealth Australia nian mai Timor-Leste hodi halao servisu diplomata entre nasaun rua.

Embaixadora Caitlin Wilson officialmente mos entrega ona karta kredensiál ba Prezidente Repúblika (PR) Jose Ramos-Horta, iha serimónia diplomátika ida-ne’ebé hala’o iha Palásiu Prezidensiál Nicolau Lobato, Kuarta (20/12/2023).

Commonwealth Australia no Timor-Leste iha istória kona-ba relasaun besik ho ema no ligasaun forte entre nia-ema sira. Austrália sai ona nu’udar apoiante prinsipál ba Timor-Leste dezde independénsia iha 2002, mantein nia estatutu nu’udar parseiru dezenvolvimentu no seguransa boot liu iha Timor-Leste.

“Nasaun rua ne’e ativamente buka kooperasaun iha setór oin-oin, inklui Dezenvolvimentu, diversifikasaun ekonómika, rejime Mobilidade Traballu Pasífiku Australia (PALM), projetu infraestrutura boot sira, Edukasaun, Seguransa no Defeza, ligasaun entre nia-ema, no mós suporta adezaun Timor-Leste nian ba ASEAN no Organizasaun Mundiál Komersiu (OMK),” hakerek komunikadu imprensa ne’ebe redasaun assesu.

Embaixadóra Caitlin Wilson lori esperiénsia barak iha dezenvolvimentu Pasífiku, polítika esterna no kestaun multilaterál sira. Nu’udar enkaregadu asuntu Australia nian ba Timor-Leste dezde fulan Maiu 2023, nia hala’o ona knaar diplomátiku signifikativu, inklui Vise-Xefe Misaun no Vise-Reprezentante Permanente ba Misaun Australia nian ba Nasoins Unidas iha Nova Iorke.