ASEAN, Saude no Seguransa Sai Ajenda Kooperasaun Quadrilaterál iha Indo-Pasífiku

DILI, www.news-viptv.com – Assosiacition South East Asian Nation (ASEAN), Saude no seguransa sai ajenda principal iha koperasaun quadrilateral iha indo-pasifiku ne’ebe koalia sai iha deklarasaun konjunta hosi Ministru Negósiu Estranjeiru Estadus Unidus nian no Ministru Negosíu Estranjeiru sira husi Governus Austrália, Índia, no Japaun.

Deklarasaun konjunta hosi ministru negosiu estranjeiru nasaun haat ne’e hasai hafoin halo sorumutuk ba dahaat ne’ebe halao iha Melbourne, Austrália, iha 11 Fevereiru 2022.

Komunikadu imprensa ne’ebe redasaun simu hosi Embaixada Estadu Unidos iha Timor-Leste hakerek, iha sorumutuk ne’e, ministru nasaun haat reafirma Quad nia kompromisu hodi apoia esforsus husi nasaun sira iha Indo-Pasífiku atu promove Indo-Pasífiku ne’ebé livre no nakloke – rejiaun ida ne’ebé inkluzivu no reziliente, no iha ne’ebé estadu sira halo esforsu maka’as hodi proteje sira-nia povu nia intereses, livre husi koasaun.

“Ami-nia enkontru ne’e promove Quad nia ajenda pozitivu no ambisiozu. Ami foku liubá servisu hamutuk ho parseiru sira husi Indo-Pasífiku hodi responde ba dezafius hirak ne’ebé importante liu iha rejiaun ne’e. Servisu hamutuk hanesan Quad, halo ami efikáz liu atu fó apoiu prátiku ba rejiaun ida-ne’e,” hakerek komunikadu imprensa ne’ebe redasaun simu, Sexta (18/2/2022).

Hanesan apoiante maka’as ba ASEAN nia unidade no sentralidade, no arkitetura lidera husi ASEAN, quad kontinua apoia parseiru sira ASEAN nian atu avansa ho implementasaun prátiku perspetiva ASEAN nian kona-ba Indo-Pasífiku. Prinsípiu sira perspetiva nian maka fundamentál ba estabilidade no prosperidade rejionál no sei sai xave atu orienta futuru ekonómiku no polítika rejiaun ne’e nian.

“Ami rekoñese importánsia husi mekanizmu no instituisaun sub-rejionál sira, inklui ba iha sub-rejiaun Mekong. Ami sei kontinua apoia Kamboja iha ninia kna’ar importante nu’udar Prezidente ASEAN nian iha tinan 2022,” dehan ministru negosiu estranjeiru quad sira iha komunikadu ne’e.

Alende assuntu ASEAN, iha deklarasaun konjunta ne’e mos mensiona asuntu saude, liliu pandemia COVID-19 ne’ebe tama on aba tinan datoluk katak Quad nia parseiru sira fornese ona doze vasina hamutuk millaun 500 resin. Hamutuk, sira kompromete ona atu fó doasaun vasinas liu biliaun 1,3 iha mundu tomak.

“Ami kontente ho Quad nia Parseria Vasina ninia progresu lalais tebes hodi espande produsaun vasina iha fasilidade Biolojia E Ltd iha Índia, ne’ebé ho objetivu atu fornese vasina maizomenus billaun 1 to’o fin tinan 2022. Ami hein katak sei entrega primeira lote vasina ne’ebé hetan apoiu husi Quad iha primeira metade tinan ida-ne’e nian. Ami ajuda daudaun formasaun ba pesoál saúde sira, kombate ezitasaun atu simu vasina no aumenta infraestrutura sira, liuliu sistema kadeia konjeladór sira, hodi lori vasina ba fatin hirak ne’ebé dook,” hateten sira iha komunikadu ne’e.

Quad serbisu hodi identifika no responde ba lakuna vasina nian no bareiras hirak ne’ebé agrava liután ho kestoens jéneru, defisiénsia no dezigualdade sosiál, no garante kobertura vasinasaun ne’ebé seguru, efikáz, asesível no ho kualidade aas iha área hirak ne’ebé maka susar atu to’o ba. “Ami simu ho ksolok inisiativa oportunu hodi koordena resposta ba kombate pandemia COVID-19 iha ámbitu Planu Asaun Globál ba Maiór Envolvimentu”.

Sira mos fó bemvindu ba progresu sira iha kooperasaun prátika ne’ebé sira lidera nu’udar Ministru Negósiu Estranjeiru sira Quad nian hodi hatán ba dezafiu rejionál sira, inklui fó asisténsia umanitária no responde ba dezastre sira (HADR), garante seguransa marítima, kombate terrorizmu, kontra dizinformasaun no garante seguransa sibernétika.

Quad fortalese nafatin kooperasaun HADR iha rejiaun ida-ne’e. Dezde tinan 2004, bainhira sira kolabora hodi hatán ba tsunami Oseanu Índiku nian, Quad nia parseiru sira kontinua responde ho lalais no efikáz ba dezastres naturais iha Indo-Pasífiku.

“Ami rekoñese katak dezastre naturál sira foin lalais ne’e no pandemia COVID-19 destaka ona nesesidade atu hari’i no mantein reziliénsia hasoru eventu sira ne’e, no ami sente orgullu hodi apoia ami-nia parseiru Tonganeze sira iha sira-nia esforsus hodi hatán ba no halo rekuperasaun hafoin erupsaun vulkaun no tsunami iha fulan Janeiru tinan 2022. Ami kompromete hametin liután ami-nia kolaborasaun no hari’i ligasaun entre ami-nia ajénsia-de-resposta sira hodi fornese apoiu HADR iha tempu oportunu no efikáz ba iha rejiaun ne’e,” hakerek komunikadu ne’e.

Quad rekoñese katak Direitu internasionál, dame no seguransa iha domíniu marítimu maka sustenta dezenvolvimentu no prosperidade Indo-Pasífiku nian. “Ami reafirma kona-ba importánsia atu adere ba lei internasionál, liuliu hanesan prevé iha Konvensaun ONU nian kona-ba Direitu Tasi nian (UNCLOS), hodi enfrenta dezafiu sira hasoru orden bazeia ba lei tasi nian, inklui iha tasi Súl no Leste Xina”.

Sira mos determinadu atu hakle’an liután envolvimentu ho parseiru rejionál sira, inklui liuhusi kapasitasaun no asisténsia téknika, atu reforsa koñesimentu iha área tasi nian; proteje sira-nia kapasidade atu dezenvolve rekursu sira tasi nian, bazeia ba UNCLOS; garante liberdade navegasaun no sobrevoo; rezolve dezafiu sira, hanesan peska ilegál, la deklara no la regula tuir lei; no promove seguransa no protesaun ba iha liña komunikasaun sira iha tasi.

Quad nafatin fahe informasaun kona-ba ameasa ne’ebé evolui hela deit no serbisu hamutuk ho nasaun sira iha Indo-Pasífiku, no iha fórum multilaterál sira, atu kontra forma terrorizmu no extremizmu violentu sira hotu. Ami denunsia kona-ba utilizasaun proxies terrorista sira iha transfronteirisa no ami apela ba nasaun sira atu serbisu hamutuk hodi elimina subar-fatin seguru ba terrorista sira; perturba rede terrorizmu no kanál finanseiru hirak ne’ebé maka sustenta sira; no hapára movimentu terrorizmu iha fronteira. Iha kontestu ida-ne’e, ami husu ba nasaun hotu-hotu atu asegura katak territóriu tomak iha sira-nia kontrolu labele uza atu lansa atake terrorista no atu aselera prosesu justisa ba ema sira ne’ebé halo atake hirak ne’e.

“Ami dala ida tan hato’o hikas ami-nia kondenasaun ba atake terrorista sira iha Índia, inklui atakes 26/11 iha Mumbai no Pathankot. Ami reafirma fali Rezolusaun UNSC 2593 (2021) katak Afganistaun nia teritoriu labele uza atu ameasa ka ataka kualkér nasaun, sai subar-fatin ka fatin ba treina terrorista sira, ka halo planu ka finansia aktu terrorista sira nian, ho espasu hirak ne’e ne’ebé la governadu bele sai hanesan ameasa direta ba seguransa no protesaun Indo-Pasífiku nian.”

Quad apoia nafatin nasaun viziñu rejionál sira atu hari’i reziliénsia no kontra dizinformasaun. “Ami mós sei koordena esforsu sira hodi ajuda parseiru sira iha Indo-Pasífiku hodi responde ba ameasa ransomware nian ne’ebé aumenta ba beibeik, liuhusi haforsa kapasidade atu asegura seguransa sibernétika no kombate krime sibernétika. Ami komprometidu atu promove dame no estabilidade internasionál iha espasu sibernétiku, no ajuda hari’i kapasidade nasoens-regionais sira nian atu implementa ONU nia Kuadru Voluntáriu ba Estadu nia Konduta Responsável iha espasu Sibernétiku”.

Ba deklarasaun konjunta pontu datoluk hakerek, Quad nia parseiru sira defende orden ne’ebé livre, nakloke, no inkluzivu, bazeia ba lei internasionál, ne’ebé proteje soberania no integridade territoriál nasaun rejionál sira nian.

“Ami reafirma ami-nia kompromisu atu defende no haforsa sistema komérsiu multilaterál bazeia ba regras, ho Organizasaun Mundiál Komérsiu iha nia núkleu. Ami kontra polítika no prátika koasaun ekonómika ne’ebé kontradiz ho sistema ida-ne’e no sei serbisu hamutuk hodi promove reziliénsia ekonómika globál hasoru asaun sira hanesan ne’e,” lian komunikadu ne’e.

Quad espresa sira nia kompromisu atu hametin esforsu diplomátiku sira atu nune ‘e vizaun ba teknolojia sira, ne’ebé orienta husi Quad nia Prinsípiu sira kona-ba Dezeñu, Dezenvolvimentu, Governasaun no Utilizasaun ba Teknolojia, sei fahe liután ho nasaun sira ne’ebé ho hanoin-hanesan.

Reflete Quad nia líder sira-nia kompromisu atu koopera hodi estabelese kadeia abastesimentu ne’ebé responsável no reziliente, ami simu proposta Austrália nian atu sai uma na’in hodi organiza Indo-Pasífiku nia Fórum Kadeia Fornesimentu Enerjia Moos iha tinan 2022 nia klaran.

“Ami reafirma ami-nia fiar katak ami-nia relasaun ema-ba-ema maka Quad nia parte forte ne’ebé maka’as liu no sauda Estadus Unidus nia programa interkámbiu foun sira iha área hirak hanesan seguransa sibernétika, seguransa marítima, kontra dizinformasaun, no promove transparénsia iha governasaun. Ami esplora hela diálogu track 1.5 entre ami-nia matenek-nain estratéjiku sira. Inklui iha ajenda husi ami-nia Ministru Negósiu Estranjeiru sira Quad nian, ami apresia servisu seluk ne’ebé la’o hela hodi realiza Quad nia Líder sira-nia inisiativa ambisiozu hirak iha área prinsipál sira hanesan Parseria Quad nian ba Vasinasaun, mudansa klimátika, seguransa sibernétika, infraestrutura, no utilizasaun ho dame ba espasu siderál, edukasaun, no teknolojia hirak ne’ebé importante tebes no emerjente,” hakerek deklarasaun konjunta ne’e.

Quad mos preokupa nafatin ho sériu kona-ba krize iha Mianmar no apela atu hapára violénsia, garante liberdade ba ema hotu-hotu ne’ebé dadur arbiru de’it, inklui ema estranjeiru sira, no la impede asesu umanitáriu. Sira reafirma nia apoiu ba esforsu sira ASEAN nian hodi buka solusaun ida iha Mianmar no apela ba rejime militár atu implementa lalais ASEAN nia Konsensu Pontus Lima no lori lalais Mianmar ba dalan demokrasia nian.

“Ami enkoraja komunidade internasionál atu serbisu hamutuk hodi apoia hapára violénsia. Ami kondena lansamentu Korea-Norte nia mísil balístiku dezestabilizadór sira ne’ebé nu’udar violasaun ba rezolusaun Konsellu Seguransa ONU nian (UNSCRs), reafirma ami-nia kompromisu iha desnuklearizasaun totál ba Koreia-Norte bazeia ba UNSCRs, no konfirma fali nesesidade atu rezolve lalais kestaun kona-ba ema Japonés sira ne’ebé raptadus.”

Hodi taka deklarasaun konjunta ne’e, quad hein katak Japaun sei organiza Simeira Lideres Quad nian tuir mai iha primeira metade tinan 2022.

“Ami sei kontinua hala’o sorumutuk tinan-tinan hodi aprezenta hanesan forsa ida ba rejiaun ida-ne’e nia di’ak,” deklarasaun konjunta ne’e hakerek.