APC Rejista Ema 1 Mate no 122 Afetadus Tamba Dezastre Naturais

DILI, www.news-viptv.com – Autoridade Protesaun Sivil (APC) iha atualizasaun dadus dezastre naturais ne’ebe akontese durante semana rua hahu 27 Outubru to’oo 10 Novembru 2025 rejista ema 1 lakon vida no ema afetadus iha nain 122.

Xefi Seksaun Komunikasaun GREC-APC, Genoveva Fernandes Almeida iha konferensia imprensa, Segunda (10/11/2025) informa, ema ne’ebe afetadus ne’e akontese iha Munisipiu Dili, Viqueque, Lautem, Baucau, Manatutu, Manufahi no Aileu.

“Numeru ema afetadus 122, uma estragus 21, ahi han uma 8, anin sobu 14. Prienxe kriteria 16, apoiu deit Emerjensia 5, Ema evakua 22, Mate 1,” dehan Porta-Voz APC ne’e iha edifisiu APC Kaikoli, Dili.

Numeru husi munisipiu sira ne’e maka APC rejista husi Dili; ahi han uma 2, Viqueque; anin sobu uma 1 no ahi han uma 1, Lautem; anin sobu uma 2, Baucau; anin sobu uma 7 no ahi han Uma 1, Manatutu; ahi han uma 3, rezulta ema lakon vida 1, no anin sobu uma 1, Manufahi; anin sobu uma 1 ahi han uma 1, Aileu; anin sobu uma 2.

“Komando APC Munisipiu ho parseirus relevante fornese asistensia emerjensia ba família afetadus sira mak hanesan ai-han no laos ai-han, food item & non-food Item. Komando Operasional Autoridade Protesaun Sivil APC Munisipiu sira sei kontinua halo hela levantamentu detaillus kona-ba sasan ne’ebe estragus no lakon,” nia dehan.

Nia mos hatete, liga ba situasaun ne’ebe mak agora dadaun akontese ona, husi autoridades protesaun sivil, imforma ba komunidade sira ne’ebe mak hela iha area ne’ebe risku, ou perigu ba dezastre naturais, husu ba komunidade sira para atu atensaun no sira bele muda ba iha fatun ne’ebe mak seguru wainhira akontese dezastre.

Entertantu, iha biban ida-ne’e APC, fahe imformasaun mos kona ba numeru unika emerjensia, wainhira iha vítima balu ne’ebe maka afeta ba dezastre naturais karik, bele imforma mai iha Autoridade Protesaun sivil, liu husi numeru emergensia 115. Atu nune’e APC tun iha terenu hodi halo intervensaun.