Parlamentu Offisialmente Kansela Sosa Kareta ba Deputadu Sira

DILI, www.news-viptv.com – Ejijensia estudante manifestante sira kona ba kansela sosa kareta ba deputadu Parlamentu Nasional sira offisialmente desidi ona liu husi aprovasaun ho unanimidade rezolusaun kansela prosesu sosa kareta nian.

Parlamentu Nasionál liu husi reuniaun plenária ordinária, iha loron 16 fulan setembru tinan 2025, Deputadu sira aprova ho unanimidade, ho votus a favor 57, kontra 0 no abstensaun 0 ba Rezolusaun n.º 65 kona-ba reorganizasaun ba jestaun no utilizasaun efisiente ba frota transporte Parlamentu Nasionál nian.

Rezolusaun ne’e ho objetivu, hodi hatan ba exijensia husi manifestante sira nian, kona-ba Parlamentu Nasionál atu sosa kareta ba Deputadu sira. Alénde ne’e konkretizasaun husi konferensia imprensa nebé mak Bankada sira halao iha loron 15 fulan-setembru tinan 2025.

Iha rezolusaun ne’e hatete “Parlamentu Nasionál nia vontade atu reorganiza Deputadu sira nia rejime transporte, garante kontinuidade ba funsaun parlamentár sira liu husi manutensaun no utilizasaun efisiente ba frota nebé iha ona, no mós liu husi posibilidade atu uza solusaun alternativu sira, nebé ekonomiku liu no proporsionál liu, iha observánsia tomak ba interese públiku” hatuir iha rezolusaun.

Parlamentu Nasionál resolve, tuir artigu 92 Konstituisaun Repúblika nian, mak hanesan “kansela prosesu akizisaun ba karreta foun sira nebé rejistu iha Orsamentu Jerál Estadu ba tinan 2025 nian; no Determina katak Sekretariadu-Jerál Parlamentu Nasionál nian adopta medida administrativu no finanseiru sira nebé destina ba manutensaun no utilizasaun efisiente ba frota nebé iha ona, garante kontinuidade ba atividade parlamentár sira” sita iha rezolusaun.

Sesaun Plenária ne’e prezide husi Prezidente Parlamentu Nasionál exersisiu, Alexandrinho Afonso Nunes, no akompaña husi membru Meza sira.

Iha 16 no 17 Setembru 2025, Estudante universitariu sira ho movimentu sosiais sira halo manifestasaun hasoru deputadu Parlamentu Nasional sira hodi kansela sosa kareta ba deputadu sira.