Konsellu Ministrus Analiza Aprezentasaun KFP Kona-ba Jestaun RH Iha Administrasaun Publika

DILI, www.news-viptv.com  –  Konsellu Ministru realiza sorumutu extraordinariu iha Segunda (8/9/2025) hodi analiza aprezentasaun hosi Prezidente Komisaun Funsaun Públika, Agostino Letêncio de Deus, kona-ba reforma jestaun ba rekursus umanus iha Administrasaun Públika.

Sorumutu extraordinariu ne’ebe lidera dereta husi Primeiru Ministru, Kay Rala Xanana Gusmão ne’e, hodi hare ba objetivu hosi aprezentasaun ne’e mak atu subliñha dezafius no lakunas prinsipais iha jestaun no planeamentu forsa traballu Estadu nian, analiza fatór sira ne’ebé kontribui ba aumentu númeru traballadór no despeza ba saláriu no vensimentus, no mós aprezenta rekomendasaun sira ne’ebé ho objetivu atu moderniza mekanizmu jestaun no asegura efisiénsia boot-liu iha utilizasaun rekursus públikus.

Inisiativa ida-ne’e tama iha ámbitu Despaxu Primeiru-Ministru n. 02/GPM/I/2025, loron 22 fulan-janeiru, ne’ebé determina kriasaun grupu traballu ida ba reforma jestaun rekursus umanus iha Administrasaun Públika.

Grupu ida-ne’e kompostu hosi reprezentantes Komisaun Funsaun Públika no Ministériu Finansas, ho responsabilidade atu estuda dimensaun ne’ebé adekuada ba forsa traballu, haree fila fali sistema karreiras no polítika remuneratória, dezenvolve mekanizmus integrasaun entre sistema jestaun rekursus umanus no finanseirus, no mós propoin orsamentu ba formasaun no kapasitasaun pesoál, iha artikulasaun ho Fundu Dezenvolvimentu Kapitál Umanu.