Governu Husu Parpol Labele Involve iha Kampana ElPar 2023

Dili, www.news-viptv.com – Governu husu ba partidu politiku sira ne´ebe konkore iha eleisaun parlamentar atu labele uza labarik sira durante prosesu kampana eleitoral.

Iha Media Briefing kona ba Papel Media iha Protesaun Labarik iha Pre, Durante no Post Eleisaun ne´ebe organiza hosi Ministeiru Assuntu Parlamentar no Komunikasaun Sosial ho Plan Internasional, Ministru Assuntu Parlamentar no Komunikasaun Sosial Francisco Jeronimo hateten maski involvementu labarik iha atividade partidu politiku sai toman ida ona, tuir membru governu ne´e nia hare katak ne´e tamba ema barak maka la intende didiak kona ba liberdade expresaun.

Iha fatin hanesan, Prezidenti Institutu ba Defeza no Direitu Kriansa (INDDICA), Dinorah Granadeiro hosi monitorizasaun ne´ebe INDDICA halo iha eleisaun prezidensial tinan kotuk, hetan duni involvementu labarik sira iha atividade kampana ne´ebe bele mos fo risku ba labarik sira no bele sai vitima.

Atu evita risku ba labarik, INDDICA hare tamba razaun laiha ema ruma maka hare labarik sira iha uma tan det inan-aman ba tuir kampana, bele lori labarik, maibe husu atu labele hatais atributu partidu iha labarik nia isin lolon no tenki tau labarik iha fatin seguru.

INDDICA mos fo hanoin nafatin ba eskola sira atu kontrola nia estudante sira hodi labele autoriza sira sai hosi eskola hodi ba tuir fali kampana, inklui manorin sira labele abandona prosesu aprendizajem durante periodu kampana eleitoral.

Entertantu Prezidenti Konsellu Imprensa, Otelio Ote mos husu ba media sira atu diak liu lalika publika fotografia ou filmazem ruma iha notisias ruma.