Xefi Familia 137 Afetadu Durante Dezastre Periodu 2-16 Setembru

DILI, www.news-viptv.com – Dezastre naturais ne’ebe akontese durante period 2 to’o 16 Setembru 2024 rezulta xefi familia 137 maka afetadu.

Iha konferensia imprensa, Autoridade Protesaun Sivil (APC) informa xefi familia ne’ebe afetadu ne’e tamba sofre dezastre anin bo’o ne’ebe sobu sira nia uma no insendiu (ahi-han uma).

“Hahu Husi loron 2-16 fulan setembro 2024, husi dadus ne’ebe APC asesu liuhosi sentru operasaun nasional CNOP rejista, semana rua ne’e hamutuk 30, ne’ebe mak rejista anin sobu hamutuk 25, ahi han 5. Husi númeru estragus ne’ebe mak ohin hau mensiona liga ho tipu desastre rua ohin ne’e família afetado hamutuk 137,” dehan Porta-voz APC, Cipriano Mesquita, Segunda (16/9/2024), iha edifisiu APC Kaikoli, Dili.

Nia esklarese, munisípio sira ne’ebe mak afeta ba tipu anin sobu ne mak hanesan, Baucau hamutuk 13, Bobonaro 1, Ermera 5, no Liquica 3, no tipu ahi-han mak Baucau 1, Ermera 2 no Lautem 2,

Durante periodu refere, APC mos rejista ema mate 1 no kanek 23. “Ema mate ne’e husi munisipiu Ainaro kauza husi tara an no sira kanek ne’e hanesan Itá hatene ita nia maluk sira husi Ermera depois  fila husi misa Tasi-Tolu mak hetan asidente iha parte Nasuta nian”.

Ho dadus ne’e, husi Janieiru to’o Setembru, APC rejista ona hamutuk xefi família 3008 maka afetadu tamba dezastre naturais.