Xefe Estadu Husu UNSW Atu Kontinua Suporta Timor-Leste Nia Edukasaun

DILI, www.news-viptv.com – Prezidente Repúblika J. Ramos-Horta kontinua husu apoiu universidade University New South Wales (UNSW) atu  apoia estudante Timor-oan sira hodi hasa’e liutan kapasidade iha area engiñaria, saúde no agrikultura.

Assuntu ne’e Xefe Estadu hato’o iha enkontru ho autoriedade máxima UNSW ne’ebé lidera husi Prof. Vlado Perkovic, iha Tersa (8/10/2024).

Além ida ne’e, iha komunikadu imprensa ne’ebe redasaun simu informa Prezidente Repúblika mos hala’o diskusaun ho estudante direitu no justisa husi UNSW hodi koalia kona-bá jeopolítika no direitu humanus iha reziaun Asia no mundu.

Iha UNSW, hasoru malu mos ho autoriedade UNSW ne’ebé suporta makas ba grupu sira ne’ebé halo konservatóriu kona-bá bee no agrikultura iha Timor-Leste no husu atu  apoiu hirak ne’e kontinua no direta ho povu iha baze.

Durante enkontru,  Prezidente Repúblika J. Ramos-Horta agradese mos ba UNSW nia apoiu sira ba Timor-Leste inklui fó oportunidade ba Timor-oan bele hala’o estudu iha UNSW Sydney.