Wiranto Partisipa Loron Aniversariu Proklamasaun Independensia Timor-Leste ba Dala 49

OEKUSI, www.news-viptv.com – Jeneral Wiranto, eis Xefe Forsa Armada Indonezia (TNI) partisipa seremonia estadu ba komemorasaun loron aniversariu proklamasaun independensia ba dala 49 ne’ebe halao iha Palaban, Oekusi.

Wiranto ne’ebe hetan konvite privadu husi Prezidenti Republika Jose Ramos Horta, mai ho Ministru Koordenador Politika no Seguransa, Budi Gunawan ne’ebe reprezenta Prezidenti Republika Indonezia Prabowo Subianto.

Iha seremonia, Wiranto no Budi Gunawan tuur iha lina daruak hafoin Prezidenti Ramos-Horta, Prezidenti Parlamentu Nasional, Fernanda Lay, Vise Primeiru Ministru no Ministru Koordenador assuntu ekonomia no Ministru Turismo no Ambiente, Francisco Kalbuadi Lay ho Prezidenti Tribunal Rekursu, Deolindo dos Santos.

Iha 2002, Unidade Krime Serio (SCU), unidade ida iha Timor-Leste nia eskritóriu prokuradoria jeral, akuza Wiranto ba krime kontra umanidade no fó garantia ba nia kapturasaun. Maibé iha inísiu fulan Maiu 2004, prokuradoria jeral kansela tiha ona akordu kapturasaun no hatun akuzasaun hotu hasoru nia.

Durante prosesu konsulta popular iha tinan 1999, Timoroan na’in 1,000 maka mate, no Timor-Leste ne’ebe sai provinsia ba dala 27 iha tempu Indonesia hetan sunu husi hahalok milisia pro otonomia ne’ebe la simu rezultadu ne’ebe hatudu Timoroan maioria hili ba dalan haketak husi Indonesia no hamrik nu’udar nasaun independent ida.

Iha 2004, Wiranto ba dahuluk husu deskulpa ba povu Timor-Leste no husu perdua husi parte hotu kona-ba saida mak akontese iha Timor-Leste no senti triste tebes kona-ba buat ne’ebé akontese. No nis mos lakon oan ida-ne’ebé nia hadomi bainhira halao devér iha Timor-Leste.