Winston Peter – PR Horta Koalia Kooperasaun Bilateral TL ho Nova Zelandia no Issu Internasional

DILI, www.news-viptv.com – Vise-Primeiru-Ministru Nova Zelândia no Ministru Negósius Estranjeirus, Winston Peters halo vizita servisu mai Dili, Timor-Leste.

Iha nia vizita servisu ne’e, Winston Peter hasoru malu ho Prezidente Repúblika Jose Ramos-Horta, Vise Primeiru Ministru Francisco Kalbuadi Lay no Mariano Assanami Sabino, no mos Ministru Negosiu Estranjeiru no Kooperasaun, Bendito Freitas.

Iha hasoru malu ho xefi estadu, parte rua diskute kona-ba asuntu rejionál hanesan oinsa restaura hikas demokrasia iha Myanmar no relasiona ho Tasi Xina Súl.

Ba asuntu global nian, Timor-Leste ho Nova Zelandia konkorda kona-ba konflitu Izrael-Hamas, atu hetan cessar-fogu imediatu no la iha impaktu, asesu ba asisténsia umanitária ne’ebé la iha restrisaun, inklui mos hato’o preokupasaun maka’as kona-ba funu agresaun ilegál no la razoavel husi Rússia hasoru Ukrâinia. Sira reforsa sira-nia apoiu ba pás ida-ne’ebé komprensivu, justu no sustentavel iha rai-Ukrâinia tuir magna karta ONU nian.

Alende ne’e iha kooperasaun bilateral entre nasaun rua, Timor-Leste no Nova Zelândia atu hametin no habelar relasaun bilaterál sira, no mós serbisu hamutuk hodi apoia kooperasaun globál no hametin instituisaun multilaterál sira, inklui reforma pratika no konstrutiva Konsellu Seguransa Nasoins Unidas nian.

Timor-Leste no Nova Zelândia fó apoiu ba Konsellu Seguransa ida-ne’ebé reprezentativu liu tan ne’ebé hetan respeitu husi membru ONU nian tomak, no iha ne’ebé membru Permanente sira ezerse sira-nia responsabilidade ba benefísiu pás no seguransa internasionál nian.

Timor-Leste no Nova Zelândia mós kontinua kontra maka’as ho uzu direitu veta. Ba Nasoins Unidas atu mantein ninia relevansia, no asegura katak nia reprezenta duni ninia membru sira-nia tomak – inklui nasaun ki’ik sira, hanesan Timor-Leste no Nova Zelândia – direitu veta ne’e devia labele utiliza.

Timor-Leste no Nova Zelândia sei kontinua servisu hamutuk hodi apoia instituisaun multilaterál ne’ebé efetivu ne’ebé adekuadu ba objetivu no suporta Timor-Leste nian nesesidade globál sira.