UPM Kaptura Funsionariu Publiku 4 Involve PSHT

Suai, news-viptv.com –  Iha apela Primeiru Ministru Taur Matan Ruak ba funsionariu publiku sira sempre fo hanoin atu funsionariu publiku sira tenki sai ezemplua diak ba povu ba sira nia servisu. Maibe, lae ba funsionariu publiku nain 4 ne’ebe ho foin lalais ne’e Unidade Polisia Maritima (UPM) kaptura sira iha areia Mota Masin tamba involve grupu arte marsias Persaudaraan Setia Hat iterate (PSHT).

Funsionariu publiku nain 4 ne’e hosi Munisipiu Ainaro ne’ebe nain  ida nudar professor, nain 2 hosi Ministeriu Saude no nain ida hosi Ministeriu Justisa.

Alende kaer funsionariu nain 4 ne’e, UPM mos kaer tan funsionariu Telemor ida hosi Munisipiu Ainaro ne’e ba hamutuk ho sira nain 4 hodi sa’e sabuk ba Atambua, Nusa Tenggara Timur, Indonesia.

“Foin dader iha ne’e, hau hamutuk ho hau nia membru UPM Suai nian ne’ebe lidera husi komandante ekipa Antonio de Araujo halo tan kapturasaun ba membru arte marsiais sira kompletu ho atributu organizasaun PSHT hamutuk nain 5 ne’ebe tama hosi area Betun nian mai iha Mota Masin,” dehan Komandante Basilio iha komunikadu imprensa ne’ebe publika hosi Servisu Relasaun Publikas Ministeriu Interior.

Nia esplika, sidadaun nain 5 ne’e ba iha loron 4 agostu 2021, sae sabuk iha Indonezia iha loron 16 Agostu no membru sira halo buska duni tuir tiru hodi kaptura sira nain 5 tanba sira tenta halai wainhira tama iha area Timor-Leste nian.

Daudaun ne’e UPM entrega ona ba ekipa Saude hodi kumpre karantina durante loron 14 nia laran.

Nia dehan, daudaun ne’e sei falta membru arte marsiais hamutuk 40 resin mak sei iha Indonezia tanba ne’e nia ho ekipa sei halo nafatin vizilansia iha fronteira rai maran no tasi.

Iha Balibo, Munisipiu Bobonaro, relata Membru PSHT husi Munisipiu Baucau hamutuk ema nain 10, entrega an ba Servisu Informasaun Polisia (SIP) hamutuk ho Intelijensia Servisu Migrasaun nian hafoin halo vizilansia loron tomak iha Aldeia Aiasa, Suku Leohitu, Postu Administrativu Balibo, Munisipiu Bobonaro no oras ne’e daudaun ekipa konjunta ne’e entrega ona iha kuartel UPF (Unidade Patrullamentu Fronteira) hodi halo identifikasaun.