Ukun Governu, CNRT sei loke Auditoria no Investigasaun ba Gastu OJE laiha relatoriu

DILI, www.news-viptv.com – Prezidenti Partidu CNRT, Xanana Gusmao iha kampana ikus CNRT nian, husu ba eleitor sira iha Kapital Dili hodi vota ba CNRT, hodi nune´e wainhira CNRT manan, nia sei fila hikas ba primeiru ministru hodi halo tan dezemvolvimentu no hadia povu nia moris iha setor hot-hotu.

Iha CNRT nia governasaun wainhira hetan konfinasa hosi povu, CNRT sei implementa politika Governu Lokal hodi munisipiu ida-idak bele hare no dezemvolve nia munisipiu.

Importante no sai prioridade mos maka wainhira nia ba Primeiru Ministru sei halo auditoria no investigasaun ba gastu Orsamentu Jeral Estadu ne´ebe laiha relatoriu no la fila ba kofre estadu.

Koordenador Partidu CNRT Munisipiu Dili, Luis Caldeira target CNRT nia votos iha Dili sei hetan too 120 mil.

Lideransa Partidu Sosial Democrata, Joao Goncalves ne´ebe uluk mos tama iha membru governu governasaun primeiru ministru Xanana Gusmao fo sasin katak dezemvolvimentu ne´ebe dadauk ne´e Timor-Leste iha ne´eobra hosi Xanana Gusmao nia lideransa, inklui Portu Tibar.

Iha kampana ne´e, CNRT mos simu afiliasaun hosi militante FRETILIN hosi Munisipiu Viqueque ne´ebe apela mos ba nia kolega iha FRETILIN atu vota ba CNRT nune´e bele dada ona kadoras ba Beasu hodi dezemvolvimentu iha Viqueque bele lao no loke kampu traballu ba jovem sira.

Kampana ikus CNRT nian iha Tasitolu, Dili hetan antusiasmu super ordinariu ho prezensa komunidade kapital Dili ne´ebe hakarak rona programa CNRT nian ne´ebe hatoo deretamente hosi Xanana Gusmao.