Timor-Leste Husu Koreia Sul Apoia Fasilidade Saude

Dili- www.news-viptv.com – Atu mellora diak liu tan servisu saude iha nasaun ne´e, Timor-Leste husu ba Koreia Sul mos atu bele apoia fasilidade saude.

Pedidu Timor-Leste nia ba asuntu ne´e hato´o hosi Prezidenti Republika, Jose Ramos Horta ba Embaixador Koreia Sul, Shin Mantaek wainhira hasoru malu ho xefi estadu.

“Excelensia (PR, red) mós hato’o pedidu ida atu apoiu sistema ka klinika balun iha Dili husi Governu Korea Sul karik posibilidade atu bele apoiu fasilidade saúde balun iha Dili hodi bele mellora sistema saúde. Tanba ne’e hau informa ba excelencia iha kompremitidu nafatin atu lao hamutuk ho Timor-Leste iha tempu agora ba oin Korea sei iha sorin para atu akompaña fo asistensia ne’ebé necesariu dezenvolvimentu Timor-Leste nian,” informa Shin Mantaek ba jornalista sira, Tersa (11/4/2023).

Iha hasoru malu ne´e, Shin Mantaek mos lori konvite hosi Prezidenti Republika Koreia Sul hodi konvida PR Horta bele partisipa iha Jeju Forum ne´ebe sei realiza iha 31 Maiu to ó 2 Junu 2023 no mos informa seremonia entrega apoia ekipamentu ne´ebe kompana Samsung fo.

“Hau mai informa Korea konvida excelensia Presidente atu partisipa iha Jeju forum korea entaun, iha vizita ida ne’e hau mai deskute ho excelensia atu mós halo enkontru bilateral entre xefi estadu rua ne´e,” esplika embaixador Koreia Sul ne´e.

Assuntu seluk ne´ebe mos nia koalia ho xefi estadu maka oinsa Koreia Sul prontu ona atu supporta Timor-Leste iha kapasitasaun rekursu umanu hodi apoia Timor-Leste nia adezaun ba ASEAN.