The Sky is Ours, Livru Hakerek husi PM Xanana Gusmão

DILI, www.news-viptv.com- Prezidenti Repúblika José Ramos-Horta ofisiálmente lansa livru husi Primeiru Ministru Kay Rala Xanana Gusmão, ho ninia títulu” The Sky is Ours”, Sesta (6-12-2024), iha salaun Nobre MNEK, Dili.

Ramos-Horta deskreve livru ne’e hanesan kontribuisaun úniku ida ba literatura timoroan nian, elojia Xanana Gusmão nia abilidade hakerek nian ne’ebé laiha tan seluk hanesan iha nasaun ne’e. Nia subliña obra nia valór seluk ne’ebé kle’an liu hakerek, hodi nota katak ida-ne’e reflete lideransa krítiku Xanana Gusmão nian durante luta ba independénsia Timor-Leste nian.

Prezidente partikularmente elojia Xanana Gusmão nia knaar iha reorganizasaun movimentu rezisténsia Fretilin no FALINTIL, hodi fó kréditu ba nia hanesan instrumentál iha restaurasaun independénsia nasaun nian iha tinan 2002.

Lansamentu livru ne’e koinside mós ho lembransa ba vítima sira 7 Dezembru nian, hodi Xefe Estadu fó onra ba eroi istóriku sira no subliña importánsia edukasaun nian iha dezenvolvimentu nasionál.

“The Sky is Ours” hanesan obra ida ne’ebé halibur diskursu no reflesaun prinsipál sira hosi Primeiru-Ministru, Kay Rala Xanana Gusmão, ne’ebé hato’o entre tinan 2017 no 2024.

Livru ne’e ko’alia kona-ba tema sira hanesan unidade nasionál, prosperidade no dezenvolvimentu sustentável, hodi destaka dezafiu no konkista sira ne’ebé forma trajetória nasaun nian ba konstrusaun futuru ida ne’ebé inkluzivu no reziliente.

Diskursu sira iha livru ne’e kompila hosi Prezidénsia Konsellu Ministrus, ne’ebé responsável mós ba produsaun livru ne’e.

Iha ninia pájina tomak, Kay Rala Xanana Gusmão reflete kona-ba knaar krusiál lideransa nian no esforsu hamutuk hodi ultrapasa situasaun-susar, ne’ebé destaka importánsia atu prezerva identidade kulturál, promove justisa sosiál no hametin aliserse demokrátika sira.

Serbisu ne’e subliña mós kompromisu Timor-Leste nian ba dezenvolvimentu ekonómiku ne’ebé sustentável no konsolidasaun dame nu’udar riin esensiál ba progresu.

Tema sentrál sira seluk ne’ebé mak iha livru ida-ne’e nia laran maka prosesu adezaun plena Timor-Leste nian ba ASEAN, nu’udar pasu estratéjiku ba kreximentu nasionál.

“The Sky is Ours” oferese vizaun ida ne’ebé abranjente no inspiradora kona-ba Timor-Leste nia trajetória, hodi selebra konkista sira ne’ebé alkansa ona no reafirma kompromisu atu harii futuru ida ne’ebé di’ak-liu ba jerasaun hotu-hotu. Liu fali rejistu istóriku ida, obra ne’e hanesan sasin ida kona-ba espíritu reziliente no vizaun estratéjiku Timor-Leste nian nu’udar nasaun ne’ebé buka prosperidade no integrasaun globál.

Livru ne’e inklui poezia Mar Meu hosi Kay Rala Xanana Gusmão, prefásiu hosi Luís Amado, eis-Ministru Estadu no Negósius Estranjeirus Portugál nian, no introdusaun hosi Agio Pereira, Ministru Prezidénsia Konsellu Ministrus.

Alende xefi Estadu, lansamentu livru ne’e hetan prezensa husi Prezidenti Parlamentu Nasional, Fernanda Lay, Prezidenti Tribunal rekursu Deolindo dos Santos, membru governu sira no korpu diplomatiku sira iha Timor-Leste.