Taekwondo Oferese Ona Medalla Osan Mean no Osan Mutin

DILI, www.news-viptv.com  – Timor-Leste hetan ona medalla rua ne’ebe oferese husi modalidade taekwondo ne’ebe hetan husi atleta Deovia da Silva no Nelio Martins.

Deovia da Silva hetan osan mean iha kategoria 46 Kg hafoin halakon nia adversariu husi Portugal, Gabriela Mendes.

Entertantu iha osan metan hetan husi Taekwondo Angolana, Jasmin Amaral no Liliana Bene husi  Mozambique.

Medalla ida tan ne’ebe Timor-Leste hetan maka osan mutin husi Taekwondo Nelio Martins ne’ebe tenki rekonese Gustavo Fernandes husi Portugal ne’ebe sai vensedor ba medalla osan mean iha klase 55 Kg.

Angola no Mozambique mos hetan tan medalla osan metan ne’ebe oferese husi Lauren Mabote (Mozambique) no Domilde Fernando (Angola) iha klase hanesan.

Iha jogos Desportivos CPLP, alende modalidade Taekwondo, iha mos modalidade seluk maka Futebol, Atletismu, Basquetebol 3 on 3, Xadrez, Karate, Tenis do Campo no Voleibol Praia.

Jogos ne’e hahu husi 19 to’o 26 Jullu 2025 ho partisipasaun husi nasaun Angola, Cabo Verde, Mozambique, Sao Tome e Principe, Portugal no Timor-Leste.