OJE ba PR Aprovadu iha Espesialidade, FRETILIN Kestiona Servisu Xefi Estadu

DILI, www.news-viptv.com – Parlamentu Nasional aprova ona Orsamentu Jeral Estadu (OJE) tinan fiscal 2025 ba Presidensia Republika iha espesialidade ho total orsamentu USD 12,175,212.

OJE PR nian ne’e aprovadu ho votos a favor 44, kontra 0, abstensaun 20, ba orsamentu ne’ebe alokadu ba Salariu USD 5,053,746, bem e servisu USD 5,746,366, transferencia publicas USD 1,055,100 no Kapital menor USD 320,000.

Iha debate OJE ne’e, bankada opozisaun FRETILIN no PLP kestiona orsamentu PR nian ne’ebe balun “hadau” fali servisu governu nian ne’ebe lolo’os PR bele halo koordenasaun ho membru governu nian relasiona ho programa ne’ebe halo mos iha PR nian.

Deputadu FRETILIN, Antoninho Bianco iha nia intervensaun kestiona ho programa Dapur ba Povo ne’ebe implementa husi PR nian ne’ebe dapur ne’e benefisia deit ba ema balun iha Dili.

“Ita atu harii dapur ba povu, e nome povu, halo deit iha Palasiu Prezidensial. Hau kestiona Dapur ba Povu PR nian ne’ebe benefisia deit ba ema balun ba Dili, halo projetu iha fatin kiik oan ida,” dehan deputadu FRETILIN ne’e, Kinta (13/11/2025), iha Plenaria PN.

Laos deit Dapur ba Povo, programa seluk ne’ebe lamerese atu PR halao maka Dili International Marathona ne’ebe tuir deputadu ne’e nia kompetensia iha MJDAC nian.

“Sei hakarak servisu ezekutivu, diak liu sai membru governu. Xefi estadu labele akumula servisu executivu, jestor ne’e laos PR, maibe governu, ne’ebe Primeiru Ministru delega ba nia membru governu sira. Fo hanoin deit ne’e laos nia (PR) papel,” kritika Antoninho Bianco.

Oin seluk ho Bankada CNRT ne’ebe nu’udar bankada Governu nian la kestiona ho orsamentu ne’ebe kritika husi partidu opozisaun tamba dalan fo PR hodi bele mos uza OJE hodi halao programa ne’ebe mensiona iha OJE PR nian.

“Hau la komprene no la hatene kolega (opozisaun) nia hakarak, xefi estadu hanesan aman atu asegura unidade nasional, nia bele halo asaun sosial ruma. Programa balun ne’ebe iha hodi lori mos Timor-Leste ba mundu, ne’ebe laiha problema. Atividade sira ne’e kria pas, garante unidade nasional,” dehan Natalino dos Santos, Deputadu CNRT.

Governu liu husi Vise Primeiru Ministru no Ministru Koordenador Assuntu Sosial, Eng. Mariano Assanami Sabino esplika OJE ne’ebe aloka ba PR liu ona diskusaun ne’ebe klaru no tais iha KRO (Komisuan Revisaun Orsamentu).

“(Osan) apoia sosial, lei organiku PR iha hela, bele apoiu ida ne’e,” dehan Assanami.

Orsamentu PR nian ne’ebe kestiona husi bankada opozisaun iha programa inisiativu PR hanesan fo han ba povo liu Dapur ba Povu, promove fraternidade umana no rekonsiliasaun, empoderamento ekonomia, no atividade desporto ho kultura nian.

“Inisiativu PR sempreiha kopera ho Governu, Festival Rabilau servisu hamutuk ho SEAK maka toma responsabilidade, konferensia nasional ba laureadu nobel siensia sira lidera husi MESCC, desportu lidera husi MJDAK, edukasaun koordena ho ME. Laiha problema ho orsamentu ne’ebe koloka iha PR, laiha problema iha sistema semi presidensialista. PR eleitu dereta, responsabilidade atu promove paz,” esplika Assanami.

Iha debate espesialidade ne’e, Joaquim dos Santos (FRETILIN) no Maria Angelina Sarmento (PLP) ho deputadu balun husu ba PN atu hasai orsamentu ne’ebe laos kompetensia PR nian no husu deit halo koordenasaun ho governu nu’udar orgaun exekutivu nian.

Proposta Lei OJE 2026 Billiaun USD 2.214.689,195 ho kategoria saláriu no vensimentu USD 476.870.249, bens no servisu korrente USD 447.904.446, transferénsia públika USD 820.710.160, kapitál menór USD 32.556.96 no kapitál dezenvolvimentu USD 436.647.379.