Sasan Expire Kontinua Sirkula, Bankada PD Husu Governu Kontrola

DILI, www.news-viptv.com – Bankada Partidu Demokratiku (PD) iha plenaria Parlamentu Nasional husu ba governu atu kontrola seriu sasan expire (liu prazu) ne’ebe kontinua sirkula no fan hosi loza sira.

Deputada Bankada PD, Rosena Fatima Martins hateten, prior liu tan, loja sira ne’ebe hatene ona nia sasan expire laos ba soe, sira kontinua fan ho folin baratu no balun fahe gratuitu ba ema kbiit laek sira.

“Hau hakarak koalia nafatin sasan ne’ebe liu prazu, ita hetan iha loja sira Dili laran iha loja Hudi Laran ne’ebe hetan ona liu ona prazu mais na realidade loja nian sei faan hela liu-liu ba aihan sira hanesan aifuan, ikan, naan karau no boek,” deklara Deputada Rosena Martins iha nia intervensaun, Segunda (19/2/24) iha uma fukun Parlamentu Nasional.

Sasan liu prazu, nia esplika, perigozu mos ba saude ema nian, satan bazeia ba peskiza husi UNTL NO Instituto Politeknik Betano, tuir peskizador Acacio Cardozo Amaral katak em-jeral produtu aifuan, ikan, naan karau no boek kontaminadu ho formalin.

“Ida ne’e sai ameasa boot ba vida no jerasaun foun tuir mai. Hosi hahan hirak ne’ebe bele hamosu moras kankru no hei oho ho neneik. Ne’e duni sujere ba membru Governu katak ita bo’ot sira tenki servisu hamutuk ho ministerial hodi bele responde ba ida ne’e, tamba asuntu saude ne’e asuntu ida ne’ebe importante presiza involve ministeiru barak hanesan Ministru Koordenador Asuntu Ekonomiku (MKAE), Ministériu Saúde, Ministeriu Turismu no Ministeriu Agricultura no Peska,” alerta deputada ne’e.

Hare’e ba AIFESA, instituisaun principal ne’ebe sempre halo inspesaun ba sasan liu prazu ne’ebe sei paradu tamba nia funsionariu sedauk asina kontratu servisu, husu ba MAKE atu hare mos asuntu ne’e hodi AIFESA bele funsiona ho diak tuir nia papel.