Rekonsiliasaun Liu Hosi Dansa Kultura

Maliana, www.news-viptv.com – Festival Fronteira 2023 husik memoria furak ida ba komunidade sira ne’ebe hela iha area fronteira entre Timor-Leste ho Indonesia, laos liu politika deit rekonsiliasaun bele halao, maibe liu hosi dansa kultura rekonsiliasaun mos hamosu amizade no unidade entre komunidade sira.

Festival Fronteira 2023 ne’ebe organiza hosi Ministeriu Juventude, Desportu, Arte no Kultura (MJDAK), Sekretaria Estadu Arte no Kultura (SEAK) ho Centro Nacional Chega, I.P, hamosu duni ambiente amizade entre komunidade sira ne’ebe hela iha fronteira, liu hosi aprezentasaun dansa kultura ne’ebe aprezenta hosi grupu dansa kultura hosi Timor-Leste no Indonesia. Sanggar Wehale hosi Timor-Leste, urgullu bele involve iha Festival Fronteira 2023 hodi hatudu sira nia talentu liu hosi dansa Dadolin.

“Ami husi Sanggar Wehale orgullu ho eventu ne’e no ohin ami dansa tradisional ho naran Dansa Dadolin katak simu malu entre feto ida ho mane ida. Entaun iha eventu ne’e mai ona ho objetivu rekonsiliasaun entre nasaun Timor-Leste no Indonezia tamba nee ami hatudu Dansa Dadolin hodi hatudu katak ita Timor-Leste no Indonezia simu malu ona no sai ida deit,” hateten Cris Anos, Koordenador Sanggae Wehale ba VIP-TV iha Kampu Futebol Maliana, Sexta (17/11/2023).

Nune’e mos Sanggar Latasga Helo hosi Kupaun sente kontenti bele hatudu mos kultura sira nian iha eventu ne’e.

“Ami apresia tebes ho eventu ne’e, ami bele hatudu ba Timor-Leste katak Kultura mak ita nia identidade maske ita mai ho dansa oioin maibe ida ne’e mak ita nia kultura duni no ami espere eventu hanesan ne’e sei kontinua hodi nune’e ita bele hatudu nafatin no promove ita nia dansa tradisional sira,” hateten Kurniawan nu’udar koordenador ba delegasaun sanggar refere.

Alende sanggar rua refere, iha mos sanggar kultura seluk hosi Timor-Leste hanesan Le-Zeaval, Santo Antonio, Fraternal, Timor Furak no hosi Munisipiu Bobonaro no Covalima. Entertantu hosi NTT, alende hosi Kupaun, iha mos sanggar hosi Malaka, Atambua no Kefa.