Promove Paz, g7+ Halo Koperasaun ho SECOMS

DILI, www.news-viptv.com  – Hare ba misaun organizasaun intergovermentail g7+ ne’ebe nia visaun ba paz, estabilidade no dezemvolvimentu halo koperasaun ho Sekretariu Estadu Komunikasaun Sosial (SECOMS) hodi promove dame.

Koperasaun entre g7+ ho SECOMS ne’e kesi liu hosi akordu intedementu ne’ebe asina hosi Sekretariu Jeral g7+, Helder da Costa ho Expedito Dias Ximenes nu’udar Sekretariu Estadu Komunikasaun Sosial iha Kuartel Jeral g7+, Palacio do Governo, Dili.

“Ita hatene katak Nono Governo Konstitusional liu hosi SECOMS nia programa prioritaria ida mak promove paz , dezemvolvimentu no  enkoraza nasaun seluk ba dalan resilensia  Tamba ne’e g7+ mos pas parte no objetivu asina akordo ne’e tamba Timor-Leste sai pais uma nain, doador no inspirador no ita mos sai ona membru planu direitu komunidade Pais de Lingua Portugues CPLP,” hateten Helder da Costa ba jornalista sira, Sexta (10/11/2023).

Entretantu Expedito Dias Ximenes esplika katak asina akordu intendementu ne’e hodi hametin liu tan g7+ ho estado hodi kria parseiru ne’ebe metin no mos g7+ ho nasaun 10 inklui Timor Leste.

“g7+ nia papel importante liu maka prevene no harii paz no estabilidade liu hosi atividade g7+ nian ho nune’e asina akordu ne’e hodi SECOMS servisu hamutuk liu tan ho g7+ hodi transforma ba publiku liu husi jornalista sira hodi promove g7+ nian estabilidade, paz no dezemvolvimentu iha Timor-Leste,” hateten Expedito Dias Ximenes.

g7+ maka organizasaun intergovernmental ne’ebe harii hosi Timor-Leste no dadauk ne’e iha ona nasaun 20 maka sai nu’udar nia membru. Objetivu organizasaun ne’e harii maka atu promove estabilidade, paz no dezemvolvimentu iha nasaun ne’ebe konsidera frazil.

Nasaun membru sira ne’e maka Afganistaun, Burundi, Republika Central Afrika, Chad, Comoro Island, Cote d’Ivoire, Kongo, Guinne, Guinne Bissau, Haiti, Liberia, Papua Nova Guine, São Tome e Pricipe, Sierra Leone, Somalia, South Sudan, Timor-Leste, Togo, no Yemen.