Prevene COVID-19 ho Variante Delta, SIJK Husu Komunidade Hakmatek iha Uma

DILI, news-viptv.com – Sentru Integradu Jestaun Krize (SIJK) apela ba komunidade sira hotu iha Timor-Leste atu hakmatek nafatin iha uma laran nune’e bele prevene moras COVID-19 ho variante Delta labele hadaet ba ema barak.    

“Husu kompriensaun no pasiénsia populasaun iha Timor-Leste laran tomak, atu kolabora no kontribui atu vírus SARS-CoV-2, inkui variante Delta, labele hada’et ba ema barak liután. Favor hela iha uma, wainhira lapresiza atu sai,” hateten Kordenadór Forsa-Tarefa ba Prevensaun no Mitigasaun Surtu COVID-19, Dr. Rui Maria de Araújo iha komunikadu imprensa ne’ebe publika iha Segunda, 30 Agostu 2021.

Apela ne’e, SIJK kontinua hato’o tamba numeru obitu ou mate ho COVID-19 kontinua rejista kada loron, inklui sira ne’ebe positivu.

SIJK mos apela ba populasaun iha Díli laran no mós iha Munisípiu sira seluk, atu aprezenta-an iha fasilidade saúde (Sentru Saúde ka Ospitál) ne’ebé besik, wainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira.

“Wainhira sedu liu hatene se virus ne’e kona ita ka la’e, di’ak liu prevene tama ba iha situasaun ne’ebe hanaran sindroma insufisiensia respiratoria aguda (SIRA) ka susar ou defisil atu dada-iis,” dehan Dr. Rui.

Ba populasaun iha Timor-Leste laran tomak, SIJK mos husu atu komunidade respeita nafatin regra prevensaun no ijiéne individuál ne’ebé Governu hatuur ona atu prevene moras Covid-19 da’et ba mai. Regra sira ne’e hanesan ita hotu hatene ona maka Uza máskara, Fase liman bebeik ho sabaun ka uza dezinfetante ruma, Evita kose liman ba matan, inus ho ibun, Wainhira kumprimenta malu lapresiza kaer liman, bensa-liman, rei-malu ka hakuak malu, Evita halibur malu barak, Hamriik ka tuur dook husi ema seluk mínimu metru ida ho balun.

Iha komunikadu ne’e, SIJK relata Kazu foun iha 113. Hosi numeru refere, Díli rejista ema nain 66,

Baucau 32, no munisípiu Seluk 15. Total kazu ativu 4.574, hodi lori totál komulativu kazu konfirmadu iha Timor-Leste 16.515.

Husi totál kazu detetadu foun ohin, kazu 61 ka 54% maka sintomátiku (hatudu sintomas)

Husi kazu detetadu foun ohin 17 (15%) simu ona vasina kompletu. Entertantu nain 13 (12%) simu ona vasina doze dahuluk.

Maski ohin loron mos relata ema nain 91 maka rekuperadu, SIJK kontinua relata ba obitu hamutuk nain 2.

Mate ne’e maka feto idozu hotu ho ida idade 73, Timoroan, hela iha Ainaro, seidauk vasina, iha 27 Agostu 2021. Diagnóstikadu iha Ainaro ho sindroma insufisiénsia respiratória aguda (SIRA) tanba Covid-19. Iha loron ne’e kedas matebian hala’o tratamentu iha Lahane tuir protokolu ne’ebé iha. Matebian is-kotu ohin madrugada 01h44, tanba respiratoric failure/parajen respiratória.

Idozu seluk ho idade tinan 83, Timoroan, hela iha Dili, seidauk vasina kompletu, iha 22 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba Covid-19. Iha loron ne’e kedas matebian hala’o tratamentu iha Vera Cruz tuir protokolu ne’ebé iha. Matebian sofre mós problema fuan. Matebian is-kotu ohin dader 10h55, tanba respiratoric failure/parajen respiratória.

Familia matebian nain 2 kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Ho numeru mate nain rua ohin loron, Totál Óbitu iha Timor-Leste hamutuk 64.

SIJK mos informa situasaun iha Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk 118.

Hosi 118 ne’e, nain 27 ho kondisaun grave. Hosi nain 27 ne’ebe grave, nain 2 uza ventilador no nain 3 uza CPAP-Continuous Positive Airway Pressure, nain 22 seluk uza oksijéniu.