PR Ramos-Horta Simu Investidura Ba Patronu UNE-TL

Dili, www.news-viptv.com – Prezidente Repúblika, José Ramos-Horta, simu Investidura no sai hanesan Patronu ba Uniaun Nasional Eskuteru Timor-Leste (UNE-TL) ba periodu 2023-2027, iha Palásiu Prezidensial, iha Kuarta (06/12/2023).

“Hau simu ondra ida ne’e hanesan segundu vez, tanba tuir tradisaun PR mak sai patronu ba movimentu eskuteru nasional ne’ebe hamutuk ho movimentu hotu iha mundu hodi kontribui nu’udar movimentu kada estrutura, kada sidadaun hodi hametin liu tan dame kada nasaun no mos inklui Timor-Leste,” dehan PR Ramos-Horta iha nia deskursu.

Xefi Estadu husu ba Eskuteiru Timor-Leste atu labele hanoin no halo bebeik konferensia no forum oioin maibe tenki iha atu hare mos problema seluk hanesan assuntu mudansa klimatika nian.

“Timor-Leste iha problema bo’ot ida ba bee, no problema ne’e laos ba Timor-Leste deit, maibe Timor osidental NTT tomak ho Indonesia,” dehan PR Ramos-Horta.

Ho movimentu eskuteiru ne’e, PR Ramos-Horta esplika, eskuteiru sira bele eduka komunidade hodi oinsa halo poupa be’e, keta estraga bee, no estraga oinsa, kuandu hahu husi bee matan kedas no tesi Ai-arbiru, ne’e mak hamaran bee matan sira.

Nune’e mos husu atu eduka komunidade oinsa atu labele soe lixu arbiru tamba bele hamosu beneno ba bee no bele hamate be matan no mos animal.

Isu be laiha iha Illa Jaco ne’ebe hamate Rusa Fuik sira, nudar patronu mos nia husu ba eskuteiru bele mobiliza voluntariu hodi salva Rusa Fuik sira.

Ho investidura ba xefi estadu, Prezidente UNE-TL, Idelta Maria Rodrigues sente kontenti PR Ramos-Horta sai ona patronu ba eskuteru nasional.