PR Ramos-Horta Partisipa Lansamentu Atauro Lobster Project

DILI, www.news-viptv.com – Prezidente Repúblika, J. Ramos-Horta, partisipa iha lansamentu projetu pilotu “Ataúro Lobster Project”, Kinta (10/10/2024), iha Universidade Tasmania, Australia.

“Inisiativa ne’e nu’udar kolaborasaun entre Institutu Estudu Tasi no Antártiku (IMAS) iha Universidade Tasmánia no Prezidénsia Repúblika Timor-Leste,” sita komunikadu imprensa ne’ebe redasaun simu husi Servisu Komunikasaun Sosial Prezidensia Republika.

Lansamentu ne’e hala’o durante vizita serbisu privadu Prezidente Ramos-Horta nian iha Universidade Tasmánia. Xefe Estadu kompromete hodi fasilita kontaktu nesesáriu sira ho Governu hodi identifika rai ne’ebé adekuadu ba dezenvolvimentu projetu nian no fornese edifísiu ida iha Díli hodi tau nia jestaun.

IMAS rekoñese hanesan sentru peskiza akuakultura lagosta nian ida ne’ebé maka lidera iha mundu, ho foku ba lagosta espinha. Sira-nia peskiza hakarak dezenvolve teknolojia inovadora sira ba hakiak espésie ida-ne’e iha kastigu, hosi faze larva nian to’o faze adultu, ho objetivu atu permite akuakultura komersiál hosi lagosta ida-ne’e ho valór ekonómiku aas.

Projetu ida-ne’e reprezenta oportunidade signifikativu ida ba dezenvolvimentu sustentável akuakultura nian iha Timor-Leste, hodi kontribui ba diversifikasaun ekonomia lokál no konservasaun rekursu tasi nian.

Iha nia hasoru malu ho Profesór Rufus Black, Vise-Reitór no Prezidente Universidade Tasmania nian  subliña programa bolsa estudu nian no inisiativa sira ba kapasitasaun institusionál nian iha setór servisu públiku, saúde no edukasaun.

Líder sira deskute mós projetu dezenvolvimentu foun ba Munisípiu Ataúro, inklui “Ataúro Lobster Project” no “Projetu Emerjénsia Ataúro”, rua ne’e implementa ho apoiu hosi Universidade Tasmánia. Inisiativa sira-ne’e subliña parseria ne’ebé buras entre Timor-Leste no universidade hodi promove dezenvolvimentu sustentável.

Enkontru ne’e reforsa kompromisu mútuo atu hasa’e kolaborasaun entre Timor-Leste no Universidade Tasmania, foka ba projetu sira ne’ebé haburas dezenvolvimentu sustentável no hadi’a servisu esensiál sira iha nasaun Sudeste Aziátiku ne’e.