banner 1000x250

PR Lu-Olo: Lere Sai Inspirasaun no Ezemplu ba Jerasaun Foun

  • Share
Tanente Jeneral Lere Anan Timur. Photo: Media PR/Juliao Fernandes
banner 728x90

DILI, www.news-viptv.com – Prezidenti Republika (PR) Francisco Guterres Lu-Olo iha nia deskursu hateten Tanente Jeneral sai ona inspirasaun no ezemplu diak ba jerasaun foun sira.

Iha prosesu transformasaun hirak-ne’e, buat barak mai hosi vizaun no lideransa hosi Forsas nia Komandante sira, Majór-Jenerál Taur Matan Ruak no Tenente-Jenerál Lere Anan Timur, ne’ebé sai ona nu’udar inspirasaun no ezemplu di’ak ba jerasaun foun sira. Ba sira ha’u hato’o obrigadu wain!,” dehan PR Lu-Olo iha nia deskursu estadu wainhira Komemora Aniversáriu FALINTIL-Forsa Defeza Timor-Leste ba dala 21, Kuarta (2/2/2022), iha Kuartel Jeral F-FDTL, Fatu-Hada, Dili.

banner 1000x250
PR Lu Olo wainhira partisipa komemorasaun loron aniversariu FALINTIL-FDTL. Photo: Media F-FDL/Carceres

Dedikasaun Tanente Jeneral Lere Anan Timur hetan omenajen no rekonesementu hosi xefi estadu nudar mos Komandante Supremu F-FDTL

“Ohin, iha forsa militár sira-nia oin, ha’u hakarak hato’o ho laran tomak ha’u-nia omenajen ba Timor-Leste nia Soldadu ida ne’ebé foin remata karreira militár ida ne’ebé naruk no furak tebes nu’udar Xefe Estadu-Maiór Jenerál FALINTIL-FDTL. Soldadu ne’e mak Tenente-Jenerál Lere Anan Timur,” dehan PR Lu-Olo.

Xefi estadu ne’e dehan tan, ”Tanba remata ona knaar tuir nia pedidu rasik, ha’u hakarak aproveita biban ida-ne’e hodi hato’o rekoñesimentu ba servisu sira-ne’ebé mak nia presta ba Pátria no FALINTIL-FDTL durante ne’e, hodi sai ezemplu di’ak ida atu banati tuir no fó prestíjiu boot ba Timor-Leste.”

Ba Tenente-Jenerál Falur Rate Laek, Iha momentu ne’ebé Señór Jenerál simu pose nu’udar Xefe Estadu-Maiór Jenerál FALINTIL-FDTL dehan, “Ita-Boot foti knaar aas liu iha ierarkia militár, hodi kaer responsabilidade aas liu iha nivel komandu militár Forsas Armadas sira-nian no akonsellamentu militár ba órgaun soberania sira ho kompeténsia iha área Defeza no Seguransa Nasionál.”

Knaar XEMJFA nian hanesan dezafiu di’ak ida ba ofisiál ne’ebé de’it iha FALINTIL-FDTL, maibé mós dezafiu boot liu ida. Hosi dezafiu boot hirak ne’ebé Jenerál sei hasoru durante ninia mandatu.

Tanente Jeneral Lere Anan Timur ho Tanente Jeneral Falur Rate Laek. Phot: Media F-FDTL/Carceres

“Ha’u hakarak temi liuliu dezafiu atu haburas no hametin estrutura superiór komandu no kontrolu nian, formasaun, aprontamentu no sustentasaun ba forsas hodi halo sira sai fleksivel liután no prontu atu hatán ba dezafiu ne’ebé de’it. Ha’u fiar katak Señór Jenerál sei hatutan asaun komandu hosi instituisaun militár ida-ne’ebé nia haknaar an nu’udar Xefe Estadu-Maiór Jenerál. Maibé, atu halo nune’e, nia sei presiza ema hotu nia apoiu no kolaborasaun, liuliu hosi sira-ne’ebé serbisu besik liu ho Xefe Estadu-Maiór Jenerál iha FALINTIL-FDTL no la kleur tan sei nomeia hosi Prezidente Repúblika,” dehan xefi estadu.

Hanesan komandante supreme F-FDTL, xefi estadu hateten, Instituisaun Militár hanesan riin importante tebes ida atu ita bele hamriik nu’udar Pátria.

Membru F-FDTL iha atrasaun. Photo: Media F-FDTL/Silva

“Se Forsas Armadas la iha uniaun, la iha kbiit no la iha prestíjiu, mak Timor-Leste sei la iha uniaun, la iha kbiit no la iha prestíjiu. FALINTIL-Forsas Defeza Timor-Leste hanesan instituisaun ida ne’ebé iha hela evolusaun nia laran no la’o tuir nia dalan tuir limitasaun sira-ne’ebé mosu hosi kontestu nasionál,” dehan PR Lu-Olo.

PR Lu-Olo dehan, Loos duni katak ita presiza hadi’a nafatin kuadru legál no regulamentár ba dezenvolvimentu no reforsu hosi instituisaun militár, hodi halo nia sai presizu no efetivu liután, atu nune’e bele hetan konsensu ida ne’ebé luan hosi ajente polítiku no órgaun soberania tomak.

Tamba ne’e, nia afirma Instituisaun Militár ne’e ba futuru tenke kompostu hosi ema militár ke iha kompeténsia no motivasaun, ne’ebé tuir padraun aas liu ba formasaun, kualifikasaun no treinu.

Writer: GUTERRES, Violante Editor: MEILANA, Evangelisto Santos
  • Share

Leave a Reply

Your email address will not be published. Required fields are marked *

error: Content is protected !!