MNEK Lansa tan Grupu Daruak FLBA

DILI, www.news-viptv.com   – Hafoin tinan ida lao, Ministeriu Negosiu Estranjeiru no Kooperasaun (MNEK) lansa tan grupu daruak ba Futuru Lider ba ASEAN (FLBA), ne’ebe lansa iha edifisiu MNEK, Pantai Kelapa, Dili, Tersa (4/2/2025).

Grupu Daruak FLBA ne’ebe lansa ne’e nu’udar kontinua husi programa MNEK nian hodi prepara juventude sira hodi sai future lider liliu ba assuntu ASEAN nian.

Bendito Freita nu’udar Ministru MNEK hateten, programa FLBA ne’e hanesan passu preparatoriu ne’ebe ke Timor-Leste presiza duni atu bele reforsa ita nia dezenvolvimentu  rekurso humanu liuliu joven lider ba futuru.

“Ita presiza duni prepara lider ba futuru ba ita nia jerasaun iha dez, quinze anus ba oin ho prezensa sira nian iha ne’e no governu nia servisu makas atu bele halibur joven Timor ho kapasidade potensia hotu-hotu atu bele partisipa iha programa ida ne’e, tamba wainhira tinan ne’e mak ita tama ona ASEAN dezafio barak ne’ebe ke ita presiza atu kumpri hola parte nu’udar sidadaun Timor-Leste ativu iha membru ASEAN implenu ita tenke iha responsabilidade barak, ne’ebe ida ne’e eventu importante,” dehan Ministru Bendito.

Ba programa FLBA, Vise-Ministra assuntu ASEAN, Milena Rangel informa katak, MNEK persiza prepara ema nian 500, ne’ebe iha lansamentu tinan kotuk hetan ona ema nain 100 no tinan ne’e iha ema nain 110.

“Iha primeiru ohin gradua ona, ba segundu ita espera katak programa ne’e bele kontinua iha governasaun ida ne’e, espektativa pelumenus ate 5 anus ita bele forma provolta de 500 lideransa foun para bele konese organizasaun ne’e i partisipa ativamente iha prosesu integrasaun regional,” dehan Milena Rangel.

Membru foun FLBA ne’e ho background oioin iha setor hot-hotu no balun servisu ona iha kompana balun no ba grupu dahuluk ne’ebe gradua ona sira iha ona kualifikadu atu instituisaun balun bele halo rekrutamentu ba sira.

Programa FLBA ne’e mós orienta foin-sa’e sira atu partisipa iha formasaun ne’ebé adekuádu ho apoiu husi matenek-na’in sira ne’ebé mai husi nasaun ASEAN.

Vise-Ministra haktuir, programa FLBA ne’e rasik la inklui iha rekizitus iha roteiru ne’ebé ASEAN fó ba Timor-Leste, maibé ida-ne’e inisiativa husi MNEK nian hodi prepara futuru lideransa ba ASEAN.

ASEAN nu’udar bloku rejionál ne’ebé dinámiku no komunidade vibrante, iha ne’ebé Timor-Leste hola parte iha enkontru no inisiativa oi-oin ne’ebé promove husi nasaun membru hamutuk ho parseiru diálogu sira.

Seremonia lansamentu grupu daruak FLBA ne’e hetan prezensa husi Vise Primeiru Ministru assuntu Sosial, Mariano Assanami Sabino no Ministru Juventude, Desportu, Arte no Kultura, Nelyo Isaac Sarmento.