LTFF 1° Divisaun I Golu Free Kick Conceição, Salva S’Amuser Hosi Lakon

DILI, news-viptv.com – FC. Buibere iha nia jogu dahuluk tenki fahe pontu, hafoin vitoria ne’ebe hela deit minutu ida, lakon ho golu free kick Maria Conceição iha minute 89 no salva S’Amuser hosi lakon.

FC. Buibere ukun joga ne’e liu hosi golu Nilda Romana iha minutu 31. Golu ne’e Nilda halo liu hosi suta free kick ho nia ain los.

Jogu ne’e rasik S’Amuser iha segunda parte konsege domina bola no halo Feny Babo ho kolega sira susar atu halo balansu jogu, tamba hetan presaun hosi jogador adversariu.

Kapitaun S’Amuser, Dolores Verdiana konsege hetan oportunidade, maibe bola ne’ebe nia suta bele kaptura metin hosi baliza Buibere.

FC. Buibere ne’ebe iha lina oin fo konfiansa ba Marcia Chaves ho Feny Babo mos labele halo buat ida no bola ne’ebe sira lansa sempre hetan blokeia makas hosi defeza adversariu.

To’o joga remata, skoru 1-1 nafatin no laiha mudansa.

Jogu entre FC. Buibere kontra FC. S’Amuser nudar jogu dahuluk Primeira Divisaun nian ba Liga Timorense Futebol de Femnino (LTFF) epoka 2021.

Iha Epoka 2021 hamutuk klubu 5 maka kompete iha primeira divisaun maka FC. Buibere, FC. S’Amuser, AD. SLB, FC. Maranatha no FC. Academica.

Liga Futebol Feto iha Timor-Leste hahu iha tinan 2020 ho klubu 11 no sai kampiaun dahuluk maka FC. Buibere.