Francisco Jeronimo Re-eleitu ba Prezidenti FFTL

DILI, www.news-viptv.com – Francisco Jeronimo re-eleitu hikas ba Prezidenti Federasaun Futebol Timor-Leste (FFTL) iha Kongressu ne’ebe realiza, Sabadu (26/2/2022), iha Hotel Novu Turismu, Dili.

Francisco Jeronimo re-eleitu hafoin iha kongressu dahitu FFTL nian ne’e manan kandidatu forte rua seluk maka Francisco Kalbuadi Lay ho Nilton Gusmão.

Prosesu eleisaun ba kargu Prezidenti tenki halao dala rua hafoin laiha kandidatu ida maka hetan votus maioria. Ho votus 5 ne’ebe Fransisco Kalbuadi Lay hetan, ho fuan retira nia kandidatura hodi fo oportnidade ba Francisco Jeronimo ne’ebe hetan votus 9 no Nilton Gusmao ho votus 7 hodi avansa ba segunda ronde.

Hafoin kongressu, Fransisco Jeronimo sei kontinua programa ne’ebe durante ne’e nia trasa ona hodi kontinua hakbesik futebol to’o iha baze.

Lakon kompete ho kandidatu atual prezidenti FFTL, Nilton Gusmao sei kontinua konsentra ba nia kargu nudar Prezidenti Liga Futebol Timor-Leste no sei nafatin servisu hamutuk ho prezidenti eleitu hodi realiza nafatin liga futebol.

Alende hili Prezidenti, eleitu mos ba vise prezidenti maka Tenente Jeneral Falur Rate Laek ne’ebe manan ho aklamasaun hafoin Aliexo “Cobra” Gama retira nia kandidatura.

Ba membru ezekutivu feto maka Engaria Pimenntel Fernandes, antiga jogador selesaun nasional no mos oan feto hosi fundador FFTL, Filomeno Fernandes.

Entertantu membru ezekutivu hat seluk maka, Augostu Henrique, Faustino da Costa, Henriques da Costa no Marito Belo.

Kongressu ne’e mos partisipa hosi reprezentante FIFA no AFC.

Reporter: Mario Fili  I  Cameraman: Marcos dos Santos