Kristaun Biqueli Selebra Loron Deramamentu Esperito Santo

BIQUELI (ATAURO), www.news-viptv.com – Igreja Evangelica Asembleia de Deus Biqueli BelNaz hamutuk Igreja Evangelica Trindade Maranatha selebra loron deramamentu Esperito Santo ba tinan 46 ne’ebe komemora iha 13 Maiu.

Prezidenti Komisaun Organizadora, Mariano da Cruz hateten, objetivu selebrasaun ne’e hodi fo hanoin nafatin kristaun sira katak so poder esperitu santo maka bele muda ema nia moris hanesan saida maka akontese iha 13 Maiu 1978.

Pastor Jemaia Gomes nu’udar Maromak Atan sente haksolok bele selebra loron importante ba kristaun sira tamba Maromak Fakar Nia Poder Esperitu Santo iha rai Atauro hanesan mos akontese iha Jerusalem, Rai Israel.

Ho Deramamentu Poder Esperito Santo ne’ebe akontese iha Atauro, Maromak Atan ne’e fo hanoin nafatin ba pastor no sarani Kristaun sira atu kaer metin nafatin poder esperitu santu tamba bele muda hanoin no hahalok moris ema kriatura sira.

Sancho Barros nu’udar sarani Kristaun senti kontenti bele selebra loron espritual ne’e hamutuk ho sarani sira iha Atauro maski nia rasik mai hosi Dili.

Sentimentu hanesan mos hato’o hosi Petronela Fallo ne’ebe mai husi rai Soe, Nusa Tenggara Timur (NTT) hamutuk ho delegasaun nain 23, katak akontesementu espritual ne’ebe akontese iha Atauro fo hikas vontade ba sira hanesan deramamentu esperitu santo ne’ebe akontese mos iha Soe iha tinan 1965.

Alende delegasaun hosi Soe NTT, iha mos delegasaun husi Atambua maka partisipa mos iha selebrasaun festa espritual refere.