DILI, www.news-viptv.com – Deputada Bankada FRETILIN, Lidia Norberto dos Santos hateten Railos okupa rai estadu ho dalan kleuk tamba kontra lei.
Lei ne’ebe Deputada Lidia mensiona ona ba Railos kontra maka lei numeru 13/2017, 5 Junu, rejimi espesial para definisaun titularidade no bem e moveis.
Reprezentante povu husi Partidu FRETILIN levanta assuntu ne’e iha Plenaria Parlamentu Nasional, iha Segunda (13/1/2025), relasiona ho eviksaun ne’ebe governu halo liu his SEATOU ne’ebe halo diskriminasaun ba povu.
“Senor Railos, nia senti an katak nia sosa rai husi komunidade, hau la kestiona kona ba ida ne’e. Hau nia intervensaun iha semana kotuk hau refere kona ba sidadaun ne’ebe okupa rai estadu, maibe SEATOU la halo intervensaun,” dehan Deputada Lidia.
Nia esplika tan, “Hau hatene katak, rai hau refere ba ne’e rai propriedade estadu nian, ke sidadaun hotu tenki kumpri bainhira estadu atu halo investimentu no atu uza. Maibe, senor Railos hateten katak, koalia laiha faktus, maibe senor Railos rasik rekonese katak rai refere rai estadu nian duni no nia okupa duni hodi fakar rai henek i bele hare iha nia intervista”.
“Ema hotu iha lei nia okos ,tamba saida mak ema kbiit laek sira okupa espasu publiku hodi buka moris, Estadu tun lalais los. Ema sira orang berada kuandu okupa rai estadu estadu la duni, ada apa dibalik itu,” deputada ne’e kestiona.
Iha nia intervensaun, husu mos ba governu atu realiza loron nasional sira iha Munisipiu Liquisa karik atu tau fatin seremonia ba isar bandeira ba fatin ne’ebe identifika ona iha valor istoria iha prosesu ukun rasik an nian, ne’ebe Liquisa mos iha.
Nune’e mos nia husu governu atu dezemvolve kampu futebol Liquisa hodi bele sai estadiu ba munisipiu refere, tamba antes ne’e 8 Governu liu husi Sekretaria Estadu Juventude no Desportu tau ona iha planu governu nian.
Entertantu Deputadu CNRT, Leandro Lobato esklarese, tuir informasaun ne’ebe nia hetan husi Railos katak rai ne’ebe nia okupa iha Manumeta nia arenda husi estadu ho nia valor taxa kada tinan US$ 10,000.
“Tuir informasaun ne’ebe hetan dehan lae, rai ne’ebe okupa bele konfirma iha DNTP. Nia la podera rai iha ne’eba, nia arenda…., annualmente selu ba estadu kuaze 10 mil, komparasaun selu taxa, iha Liquisa so nia mak selu bo’ot, no fo servisu ba ema kuaze 100,” esplika Leandro Lobato.
Nia mos hateten, labele politiza eviksaun ne’ebe governu halo hodi hateten halo diskriminasaun no hare deit ba koor partidu.
“Politika eviksaun la tau kor partidu no grupu, se bele hare eviksaun foin halo ne’e militante CNRT mak sofre ba eviksaun, la persiza hare koor partidu, tenki kumpri regra governu,” dehan deputadu ne’e