Bankada Opozisaun Vota Abstensaun ba Orsamentu PN nian

DILI, www.news-viptv.com – Deputadu Bankada Opozisaun FRETILIN no PLP vota abstensaun ba orsamentu Parlamentu Nasional nian iha debate espesializasaun Orsamentu Jeral Estadu (OJE) tinan fiscal 2026.

Maski vota abstensaun, orsamentu PN passa ho total votos a favor 41 ho osan ne’ebe alokadu hamutuk USD 19,073,404, iha votasaun ne’ebe realiza iha Kinta (13/11/2025) lokoraik.

“Parlamentu Nasional nia orsamentu ita vota abstensaun mos ita lalika selu salariu no manutensaun,” dehan Prezidenti Parlamentu Nasional, Maria Fernanda Lay ho “goza” ba deputadu opozisaun sira hodi simu hamnasa ho deputadu bankada Governu sira.

Orsamentu ne’e fahe bá kategoria Saláriu no Vensimentu USD 11,217,005, Bens no Servisu Korrentes USD 6,242,298, Transferénsias Públikas USD 955,180 ho Kapitál Minór USD 658,921.

Orsamentu alokadu ne’e sei finansia programa bo’ot ha’at, sub programa ualu no atividade hamutuk 22.

Programa haat ne’e mak hanesan; fomenta relasaun internasional no kooperasaun Parlamentu, Garante ezersisiu ba funsaun sira konstitusionais parlamentu nian, promove kultura abertura ida no transparensia iha parlamentu, no funsional no dezenvolvimentu instutisional.

Proposta Lei OJE 2026 Billiaun USD 2.214.689,195 ho kategoria saláriu no vensimentu USD 476.870.249, bens no servisu korrente USD 447.904.446, transferénsia públika USD 820.710.160, kapitál menór USD 32.556.96 no kapitál dezenvolvimentu USD 436.647.379.