Kontra Kodigu Estrada, Polisia Tranzitu Prende Motorizada 66

DILI, news-viptv.com – Motorizada hamutuk 66 hetan prende hosi Polisia Tranzitu tamba kontra kodigu estrada.

Tuir publikasaun komunikadu imprensa ne’ebe publika hosi Servisu Relasaun Publiku – Miniteriu Interior informa Polisia Nasional Timor-Leste, liu husi Departamentu Nasionál Trânzitu no Seguransa Rodoviária (DNTSR) intensifika nia servisu halo kontrola movimentu transporte iha estrada publiku ne’ebe kontra kodigu Estrada nian.

Sub Xefi DNTSR, Inspetor Xefi Polisia, Inocencio Freitas, haktuir prezensa polisia nian iha dalan publiku hodi halo kontrola jestaun viaturas.

“Orientasaun komandu hato’o ba komandante sira no ba membrus tomak hodi regulariza seguransa rodoviaria liu-liu hare ba karta kondusaun no-mos asesores transporte sira hanesan xapa matrikula, ispellu laiha no lampu laiha tanba ida ne’e ita konsidera infrasaun, maibe ba transporte sira ne’ebe dokumentu mate durante Estadu Emerjensia ita konsidera vale nafatin,” esplika Inocencio Freitas,Tersa (18/8/2021) kalan ne’e.

Nia dehan, durante ne’e Polisia Tranzitu sempre fo hanoin bebeik ba motorista sira atu wainhira uza transporte tenke kompleta lai rekezitus sira hanesan lori dokumentu propriu no monta asesoris transporte nian antes kontinua halo movimentu iha estrada publiku.

“Atu informa mos katak atividade pasa revista ohin ne’e, ita konsege prende tan motorizada Guvernu nian iha 3, motorizada privadu iha 61 inklui dokumentu motor 2, entaun hamutuk 66 mak ita rekolla,” nia hatutan.

Inocencio haktuir, motorista sira ne’ebe kontra ona lei kodigu estrada tenke kompleta uluk lai prosesu administrasaun hodi selu multa iha banku hafoin bele mai foti motorizada hirak ne’e.

Hafoin remata atividade pasa revista Segundu Komandante DNTSR ne’e ho nia membru sira transporta kedas motorizada hirak ne’e hodi asegura iha Kuartel Jeral PNTL Caicoli.