Konklave Loron Dahuluk Hamosu Suar Metan, Sedauk iha Amu Papa Foun

VATIKANU, www.news-viptv.com – Laiha Amu-Papa ida maka eleitu hafoin votasaun dahuluk hosi konklave hodi hili Amu-Papa ba dala 267.

Suar metan ne’ebe mosu hosi xaminé iha Kapela Sistina nia leten iha tuku 9 kalan oras vatikanu nian, fó sinál katak votasaun dahuluk hala’o ona iha konklave no sedauk iha amu papa foun maka eleitu.

Hamutuk iha kardeal 133 husi nasaun 71 maka tuir konklave ba tinan ne’e. Konklave ne’e hodi hili amu papa foun troka Papa Francisco ne’ebe mate iha 21 abril.

Ema na’in 45,000 halibur ona iha Prasa São Pedro nian hodi hein anúnsiu, ne’ebé hein ona iha tempu balun hafoin tuku 7 kalan. Ikusmai, sira tenke hein to’o tuku 9.

Entre sira ne’ebé iha prasa maka Diákonu Nicholas Nkoronko husi Tanzánia. Ko’alia ba Vatican News, nia hatete: “Ami nia papél iha ne’e maka reza no hamutuk ho sarani sira seluk, katóliku sira seluk, hodi reza ba Espíritu Santu hodi orienta prosesu tomak.”

“Iha ne’ebé de’it maka Amu-Papa foun mai”, Diákonu Nkoronko subliña, “karik iha Áfrika, Ázia, Amérika, saida maka ita presiza maka ita presiza Amu-Papa santu ida. Ita presiza Amu-Papa ida ne’ebé sei orienta Igreja no sei sai pastor Igreja nian.”