Konferensia Nasional CNRT Legaliza Formasaun Governu ho PD

DILI, www.news-viptv.com – Konfresista sira iha konferensia nasional Partido Congresso Nacional da Recontrução de Timor-Leste (CNRT) legaliza ona koligasaun ho Partido Democratico (PD) hodi forma IX Governu Konstitusional.

Aseitasaun konfresista ne´e hatudu liu hosi vota unanimidade hafoin Sekretariu Jeral Partidu CNRT, Francisco Kalbuadi Lay fo opsaun rua katak ida, aseita forma governu ho koliga ho PD no la aseita koliga ho PD hodi forma governu.

“Prontu, konfresista konkorda CNRT forma governu ho PD,” deklara Francisco Kalbuadi Lay, Segunda (19/6/2023) iha Salaun OKA Surik Mas, Dili.

Iha konferensia nasional ne´e, Francisco Kalbuadi Lay lori naran partidu hatoo agradese ba povu ne´ebe fo ona konfiansa boot ba CNRT hodi hetan kadeira 31.

“Prestasaun boot tebes ne´ebe CNRT hetan iha istoria eleisaun, hosi 21 ita bele hetan 31, agradese ba povu no imi hotu nia esforsu ba susesu ida ne´e” hateten Kalbuadi Lay.

Entertantu Prezidenti Partidu CNRT, Kay Rala Xanana Gusmão husu bá kuadrus CNRT hosi nasional too baze atu servisu nafatin no kontinua prepara aan hodi implementa programa ne´ebe CNRT hatoo iha kampana eleitoral.

“Servisu sedauk hotu, foin maka atu hahu, liliu iha munisipiu sira, prepara aan ba, tamba ita sei halo dezentralizasaun hodi lori dezemvolvimentu ba povu,” apela Xanana ba konfresista sira.

Antes ne´e, Partidu Democratico (PD) halo ona nia konferensia nasional hodi desidi lao ho CNRT iha formasaun governu foun.