Komemora Loron 30 de Agostu, CO-25 Sei Halo Atividade Reflesaun Kona-ba Luta iha Pasadu

DILI, www.news-viptv.com – Comite Orientador 25 (CO-25) ne’ebe hakerek kona ba livru istoria luta ukun rasik an Timor-Leste nian sei realiza atividade reflesaun kona ba luta iha tempu pasadu durante komemorasaun loron 30 de Agostu ou loron konsulta popular.

Atividade reflesaun ne’e sei realiza iha munisipiu to’o postu administrasaun hotu hahu 27 to’o 30 Agostu ho finansiamentu husi Ministeriu Administrasaun Estatal ho orsamentu US$ 160,000.

“Comite Orientador 25 sei halao nia atividade iha municipiu hotu hotu,konsentradu iha posto no teritori laran tomak, no atividade ida ne’e sei halao enparseria ho Ministeriu estatal, ha’u fiar katak iha munisipiu hotu hotu hatene ona komite sei halao atividade ida ne’e hateten” dehan Prezidenti CO-25, Constancio Pinto ba Jornalista sira (23/8/2024), iha Bidau Akadiruhun, Dili.

Atividade reflesaun ne’ebe sei halo ho modelu oi-oin hanesan expozisaun, troka memoria, no aprezentasaun filmazem kona baTimor-Leste nia luta ba ukun rasik an.

“Atividade ida ne’e atu ajuda ita nia populasaun ou partisipante sira tomak iha postu ida idak, atu ita bele hamutuk halo reflesaun ida kona ba pasadu no prezente no futuru nasaun nian,” nia hateten.

Nia esplika, 30 de Agostu 1999, povu Timor-Leste desidi futuru Timor-Leste nian no ohin loron sai nasaun ida independente.

“Iha 2024 Ita hotu sei hamutuk halo reflesaun kona ba  pasadu kona baa luta terus nebe mak ita liu, sofrementu nebe mak ita enfrenta hodi alkansa ita nia independensia, hafoin alkansa ita nia independensia ita sei halo reflesaun mos kona ba benefisu nebe mak ita hetan  durante nee, ba ita nia populasaun no ita nia joven sira,” nia hateten.