Kada Loron, Klinika Bairo Pite Rejista Pasiente 100 Resin

DILI, news-viptv.com – Klinika Dr. Daniel Murphy-Bairo Pite iha nia atendementu saude kada loron rejista pasiente nain 100 resin.

Maski rejista pasiente ho numeru kada loron, Linu Alvar nudar pessoal mediku iha klinika ne’e hateten klinika kontinua atende pasiente sira tuir regras konfinamentu domisiliariu jeral ne’ebe governu implementa, inklui protokolu Organizasaun Saude Mundial (OMS) ba COVID-19 nian.

“Durante situasaun surtu COVI- 19 hare ba iha situasoens injeral durante ne’e, ami nia pasiente sira no komunidade sira ne’ebe hakarak halo tratamento mai iha klinika Bairo-Pite mai ho situasaun nebe flexivel, la kria ho buat balun ne’ebe atu limita pasiente sira. Importante liu ami kumpri ba iha regras ne’ebe maka ministeriu saude ho OMS fo mai tenki halo tuir regras,” dehan Alvar ba news-viptv.com, Tersa (31/8/2021), iha nia knar fatin Klinika Bairo Pite, Dili.

Regras ne’ebe nai mensiona maka, wainhira tama ba klinika pasiente sira tenki uza mascara, fase liman ho sabaun, no halo distansia social.

Nia informa, dadauk ne’e Klinika Bairo-Pite iha deit mediku nain 1 no hato’o ona pedidu ba Ministeriu Saude hodi bele apoiu mediku nain 3 tan nune’e bele mos halo atendementu ba programa HIV no Tuberkuloze (TB).

Alende ne’e hasoru menus mediku, Klinika Bairo-Pite mos hasoru difikuldade ba ekipamentu saude. Maibe, kestaun ne’e la sai obstaklu ba sira hodi kontinua halo tratamentu saude ba publiku.