DILI, www.news-viptv.com – Porta Voz Movimentu Juventude Millenial no Estudante, Vitoria Soares hare katak kandidatura antiga Prezidenti Republika, Jose Ramos Horta ne’ebe kandidata an fali ba Eleisaun Prezidensial iha kapasidade as no bele hakotu impasse politiku ne’ebe lao besik tinan 5.
Ho figura kandidatura ne’e, movimentu refere ho prontidaun fo sira nia konfiansa apoiu no votos ba Ramos Horta nune’e bele hetan vitoria iha eleisaun prezidensial.
“Ramos Horta iha kapasidade akumulativu hodi hakuak lider hotu, atu nune’e hakotu impasse politika iha rai laran,” hateten Vitoria iha konferensia imprensa ne’ebe halao iha Sede Kandidatura PR Jose Ramos Horta Osindo, Dili, Kuarta (26/1/2022).
Movimentu ne’e observa katak Ramos Horta iha vizaun diak ba dezemvolvimentu ekonomia Timor-Leste nian nune’e bele hamutuk ho governu hodi dada investor rai liur sira mai Timor-Leste.
“Kandidatu Horta mos iha vizaun politika externa ne’ebe luan no bele rezolve mos problema externa no halo relasaun diak ho nasaun barak.
Porta-voz ne’e mos hateten sira lamenta ho governu no Parlamentu Nasional atual ne’ebe aprova orsamentu jeral estadu barak, maibe la fo benefisiu ba povu iha baze.
Ramos Horta nia kandidatura hetan apoiu hosi Partidu CNRT no fugura Kay Rala Xanana Gusmao, lidera nasional ne’ebe sempre fo vitoria ba kandidatura prezidenti republika seluk hanesan Ramos Horta rasik iha 2007, Taur Matan Ruak (2012) no Francisco Guterres “Lu-Olo”.
Lamentasaun Xanana Gusmao ba PR Lu-olo, hili Xanana ikus tula liman fali ba Ramos Horta hodi sai prezidenti republika ba 2022-2027.