Posibilidade Timor-Leste Sai Full Member ASEAN iha Outubru 2025

DILI, www.news-viptv.com – Estadu membru ASEAN sira fo ona sinal katak posibilidade iha Outubru 2025 Timor-Leste sai ona full member ba ASEAN.

Hafoin fila husi Forum Futuru ASEAN iha Vietnam, Prezidenti Republika Jose Ramos-Horta Informa iha simeira ASEAN fulan Maiu, estadu membru sira sei halo dezisaun offisial hodi desidi Timor-Leste nia adezasaun.

“Fulan Maiu sei iha simeira ida, iha semeira ida ne’e mak sira bele halo desizaun offisial formal difinitivu. Maibe, Primeiru Ministru Malazia Anwar Ibrahim hatete ba hau katak, sira hare simeira iha fulan Outubru ka Novembru konformi sira marka mak Timor-Leste foin tama no sira halo desizaun simeira iha fulan Maiu ne’e, depois serimonia adezaun bele akontese iha simeira Outubru ka Novembru,” hateten PR Ramos-Horta ba jornalista sira iha Aeroporto Internasional Prezidenti Nicolau Lobato, Kinta (27/2/2025).

Xefi estadu halo vizita ba Vietnam hodi hatan konvite husi ASEAN no Governu Vietnam hodi sai mos orador ida iha Forum Futuru ASEAN. Iha forum ne’e, xefi estadu fahe esperensia esforsu Timor-Leste nian hodi sai membru ASEAN, no servisu ne’ebe uluk nia hahu ho ASEAN iha tinan 1974 wainhira Timor-Leste sei parte husi colonial Portugues.

Alende partisipa Forum Futuru ASEAN, PR Ramos-Horta mos halo inkontru official ho Sekretariu Jeral ASEAN, Primeiru Minsitru Vietnam, Pham Minh Chinh no Primeiru Ministru Malazia, Anwar Ibrahim, no mos Primeiru Ministru Nova Zelandia, Christopher Luxon.

Iha hasoru malu ho PM Vietnam no Nova Zelandia, lideransa nasaun rua refere pronto ona atu vizita Timor-Leste hodi hametin liu tan relasaun bilateral nian.

“Espera ke Primeiru Ministru ita nian ho governu bele hare akordu konkreta ruma hodi rai rua ne’e bele asina no implementa,” dehan xefi estadu.

Durante vizita Vietnam, PR Ramos-Horta louva ba ekonomia Vietnam nian ne’ebe kontinua forte ho nia kresimentu ekonomia sa’e to’o 7 %.

“Vietnam iha ekonomia forti teb-tebes iha mundu, 7 % kresimentu tinan hira nia laran, rai barak iha mundu enfrenta krizi ekonomia maibe vietnam forti nafatin. Sira simpatia makas ba Timor-Leste, iha teknologia agrikultura bele hatete numeru 1 iha mundu, entermus produtividades no ita nian 3 ou 4 tonelades diak ona ba pro-hektares, i sira nian 12 ou 14 tonelades i laos deit foos maibe hahan oin-oin,” hatete PR Ramos-Horta.

Iha teknolojia, epslika xefi estadu, Vietnam mos top iha mundu, “Imi hatene Telemor iha ne’e avansadu liu fali, Telemor sei hare bainhira mak ita bele haksoit ba 5G no sira hakarak hare ba ida ne’e tanba kabu-submarinu mos besik konklui ona entaun timor bele haksoit ba 5G”.