Hatama Illegal, SNI ho UPF Prende Atributu PSHT

BATUGEDE, www.news-viptv.com – Servisu Nasional Inteljensia (SNI) hamutuk ho Unidade Polisia Fronteira (UPF) konsege prende atributu hosi Grupu Arte Marsiais Persaudaraan Setia Hati Terate (PSHT) neébe hatama ilegal, liu hosi servisu sekreta neébe halo iha Kuarta (13/7/2022).

Komandante UPF (Unidade Patrullamentu Fronteira), Superintendente Polísia, Euclides Belo, hateten atributu ne’ebé rekolla mai tanba iha koordenasaun di’ak ho SNI.

“Atu informa katak, foin daudaun, ita-nia membru Servisu Sekreta hosi Komandu UPF ho SNI (Servisu Nasionál Intelijénsia), halo vizilánsia hamutuk iha fronteira konsege hetan komunidade balu tenta hatama atributu Grupu Arte marsiais ne’ebé partensia ba Grupu Persaudaraan Setia Hati Terate (PSHT), tuir dalan ilegál iha Suku Batugade, Postu-Administrativu Balibo, Munisípiu Bobonaro,” esplika Euclides Belo iha pajina offisial Servico Relasaun Publicas.

Nia dehan, operasaun ne’e ekipa konjunta la konsege kaptura autór tanba sira konsege halai no soe hela sasan sira ne’e iha mota laran maibé sira sei esforsa an halo servisu extraordinaria iha liña fronteira hodi buka tuir suspeitu sira ne’e.

“Sira halai soe hela saku bo’ot 1, plástiku bo’ot 2, pasta 1, farda treinu PSHT pares 52, sabuk hena mutin 20, faru PSHT kor mutin 1, kor metan 4, pasta ki’ik hamutuk 14 no atributu hirak ne’e ita asegura ona iha Kuartel UPF, Fatuk Bo’ot, Batugade”, relata Euclides Belo.

Kestiona kona-ba sidadaun sira ne’ebé kontinua tama ilegal, Euclides Belo haktuir, fronteiras terrestre hanesan fatin ne’ebé mak luan no presija apoiu hosi komunidade sira atu servisu hamutuk ho UPF atu nune’e bele halo kapturasaun ba ema sira ne’ebé mak tama sai ilegál.

“Ita nafatin servisu hamutuk ho komunidade iha liña fronteira, faktus hatudu katak informasaun hotu ne’ebé iha mai husi komunidade ne’ebé iha ona konsiensia nasionalismu, hatene sentidu estadu mak pasa informasaun ba servisu sekreta UPF no SNI, aumezmu tempu ami apela nafatin ba komunidade sira atu servisu hamutuk ho membru sira hodi asegura no prevene ema labele hakur liu fronteira ho ilegalmente nune’e ita bele asegura didi’ak ita-nia fronteira,” nia dehan.