Haforte Bilateral Timor-Leste ho Xina, PR Ramos-Horta to’o ona Beijing

BEIJING, www.news-viptv.com –Prezidenti Republika, Jose Ramos-Horta ho delegasaun to’o ona iha Beijing, Xina, Domingu dadersan ohin, tuku 7 oras Beijing nian.

Reportazem Dereta Nuryanti Fatima, Jornalista VIP TV hosi Beijing-Xina

Objetivu husi xefi estadu halo vizita ida ne’e mak atu hametin relasaun bilaterál, promove kooperasaun ekonómika, no haforsa parserias rejionál sira.

Offisialmente, xefi estadu sei hahu nia vizita estadu iha Segunda (loron 29 Jullu).

Iha ajenda aban nian, xefi estadu sei hasoru halo enkontru ho Prezidente Xi Jinping, Primeiru-Ministru Li Qiang, no Prezidente Kongresu Nasionál Populár, Zhao Leji.

Atu informa mos, iha vizita xefi estadu ne’e sei iha akordu importante balun inklui Planu Kooperasaun entre Governu Xina no Timor-Leste kona-ba Inisiativa Belt and Road, Akordu Servisu Aéreu, no kooperasaun iha área agrikultura no media.

Tuir ajenda mos, Prezidente sei hato’o diskursu importante iha Fórum Negósiu kona-ba “Oportunidade Investimentu Timor-Leste nian,” aprezenta perspetiva investimentu ba investidór potensiál sira husi Xina no kria oportunidade rede ba empreza sira husi nasaun rua ne’e.

Tuir Prezidente Ramos-Horta deklara Vizita ida ne’e reprezenta pasu signifikativu ba Timor-Leste iha promosaun ligasaun besik liu ho Xina no Vietnam no promosaun ita nia interese komún iha rejiaun.

Xefi estadu mos hateten katak Timor-Leste hein atu hakle’an nia parserias no esplora dalan foun ba kooperasaun ne’ebé sei fó benefísiu ba ita nia nasaun sira no kontribui ba estabilidade no prosperidade rejionál.

Iha vizita xefi estadu nian, iha mos delegasaun governu nian ne’ebe lidera husi Vise Primeiru Ministru, Ministru Koordenador Assuntu Ekonomia e Ministru Turismu no Ambiente, Francisco Kalbuadai Lay ne’ebe sei asina nota do intedementu ho Governu Xina.

Nota intedementu ne’ebe asina maka ho Ministru Komersiu Xina iha Reforsa Kooperasaun Investimentu iha Ekonomia Dijitál no Promove Kooperasaun Investimentu iha Dezenvolvimentu Verde.

Akordu seluk ne’ebe sei asina mos maka ho Ajénsia Kooperasaun ba Dezenvolvimentu Internasionál Xina hodi Promove Implementasaun husi Inisiativa Dezenvolvimentu Globál no Promove projetus infraestruturas kooperasaun Xineza.