Governu Timor-Leste Lansa Relatoriu Tematiku Sensus Populasaun no Uma-kain 2022

DILI, www.news-viptv.com – Governu Timor-Leste iha parseria ho Nasoins Unidas, tersa (14/5/2024) , lansa relatóriu temátiku Sensu 2022 iha edifisiu Ministeriu Finansas Aitarak Laran, Dili.

Governu Timor-Leste liu husi Institutu Nasional Estatistika halibur ona informasaun kona-ba ema hotu-hotu ne’ebé hela iha nasaun ne’e, hahú kedas husi inísiu sensu iha loron 5 fulan-setembru, dadus sira husi sensus nian ne’e uza hodi apoia planeamentu no orsamentu ba programa dezenvolvimentu sira iha Timor-Leste.

Durante lansamentu, Ministra Finansas, Santina Cardoso, hateten importánsia husi dadus iha planeamentu dezenvolvimentu hodi alkansa ODS no Planu Estratéjiku Dezenvolvimentu Nasionál.

Koordenador Rezidente Nasoins Unidas Interinu iha Timor-Leste Bilal Aurang Zeb Durrani hateten liuhusi lansamentu relatóriu temátiku sira-ne’e fó-hanoin ita katak urjente tebes atu halo revizaun ba meta sira ne’ebé estabelese ona ba dezenvolvimentu setór oioin.

Investimentu iha dadus hanesan populasaun no sensus no iha kapitál umanu sei ajuda nasaun ne’e atu aporveita no uza potensiál populasaun hotu-hotu nian, inklui populasaun sira ne’ebé tradisionalmente marjinalizadu, porezemplu; feto, joven sira, ferik-katuas sira no ema ho defisiénsia sira. Durante sensu ikus ne’ebé hala’o iha 2015, Timor-Leste rejista populasaun millaun 1.18.

Hahú husi tinan 2004, UNFPA kontinua fó asisténsia téknika ba Governu Timor-Leste liuhusi Institutu Nasional Estatistika ne’ebé uluk bolu GDS hodi hala’o sensu.

Globalmente, UNFPA suporta nasaun sira iha sensu populasaun no uma, no peskiza sira seluk ne’ebé bazeia ba populasaun liuhosi parseria ba tempu naruk ho Gabinete Estatistika iha mundu tomak.