Governu Kontinua Programa Bolsa da Mãe, Hapara Maka Bolsa da Mãe Jerasaun Foun

DILI, www.news-viptv.com – Nono Governo Konstitusional sei kontinua programa Bolsa da Mãe ne’ebe fo apoiu ba komunidade vulneravel no ema sira ne’ebe iha nesesidade espesial.

Maibe, Bolsa da Mãe Universal ga Bolsa da Mãe jerasaun foun sei la kontinua iha tinan oin ba programa Governu nian. Dezisaun Ministeriu Solidariedade Sosiál no Inkluzaun (MSII) hapara programa ne’e hafoin hetan konsiderasaun no peskiza ho kuidadu katak ministériu deskobre programa ne’e la sustentavel iha ninia forma atuál no presiza halo mudansa atu asegura katak programa ne’e fó apoiu di’ak liu ba sira ne’ebé presiza liu.

Assuntu ne’e hatoo hosi Ministra Solidariedade Sosiál no Inkluzaun, Verónica das Dores wainhira hasoru Prezidenti Republika (PR) Jose Ramos Horta hodi esplika

“Nono Governu Konstituisionál la’ós atu hapara bolsa da mãe tomak laiha. Bolsa da mãe ne’e iha rua, ne’ebé aumezmu la’o hanesan, bolsa da mãe kondisionál katak ba maluk vulneravel sira duni ne’ebé hahú kedas iha 2008 to’o agora, depois Oitavo Governu mai kontinua tan bolsa da mãe jerasaun ka bolsa da mãe universál, entaun ami tenke halo definisaun ne’e katak la taka bolsa da mãe tomak,” informa Ministra Veronica ba jornalista sira hafoin hasoru malu ho PR Horta, Segunda (20/11/2023), iha Palasiu Prezidensial, Dili.

Ba Bolsa de Mãe jerasaun foun, Governu la kontinua tamba la preve ona nia orsamentu iha Orsamentu Jeral Estadu tinan 2024.

Ministériu ne’e sei hala’o peskiza liután hodi dezenvolve programa Bolsa da Mae ida-ne’ebé realistiku no sustentavel liu, ne’ebé sei responde ba nesesidade povu Timor-Leste nian. Iha tempu ne’ebá, programa subsidiariu Bolsa da Mae sei kontinua fó apoiu ba sira ne’ebé presiza liu.

Prezidente Repúblika hato’o ninia apoiu ba desizaun Ministériu nian no mós subliña importánsia atu asegura katak Timor-oan hotu iha asesu ba apoiu sosiál ne’ebé sira presiza atu moris moris saudavel no produtivu.