Governu Aprova PAN ba Rezolusaun 1325

DILI, www.news-viptv.com – Hare’e ba importansia hodi promove igualdade jeneru iha faze hot-hotu prosesu konstrusaun pas no seguransa, Governu liu hosi sorumutuk Konsellu Ministru aprova ona Planu Asaun Nasional (PAN) kona ba Rezulusaun 1325.

“Aprova mós projetu Rezolusaun Governu ne’ebé aprezenta husi Ministru Interiór, Francisco da Costa Guterres, kona-ba Planu Asaun Nasionál tinan 2024-2028 ba implementasaun Rezolusaun 1325 Konsellu Seguransa Nasoins Unidas kona-ba Feto, Pás no Seguransa,” hakerek komunikadu imprensa ne’ebe publika Kuarta (10/1/2024), iha portal official governu nian.

Rezolusaun 1325, ne’ebé aprova husi Konsellu Seguransa Nasoins Unidas iha loron 31 fulan-outubru tinan 2000, ne’ebé ko’alia liu importánsia hodi promove igualdade jéneru iha faze hotu-hotu prosesu konstrusaun pás no seguransa, no rekoñese impaktu espesífiku husi funu kontemporánea sira ba feto no labarik feto sira nia moris.

Planu Asaun Nasionál 1325 define objetivu no asaun sira ne’ebé sei hala’o iha ámbitu pilár prinsipál haat: Partisipasaun, Prevensaun, Protesaun no Konstrusaun Pás, ho objetivu atu reforsa papél feto nian iha manutensaun pás no konstrusaun Estadu.

Planu ida-ne’e, lidera husi Ministériu Interiór, konta ho kolaborasaun husi ministériu oioin, ne’ebé inklui Solidariedade Sosiál no Inkluzaun, Justisa, Defeza, no Sekretaria Estadu Igualdade no Inkluzaun. Planu ne’e elabora liuhusi prosesu konsultivu no inkluzivu ida ne’ebé inklui mós parseiru dezenvolvimentu, organizasaun sosiedade sivíl, nune’e mós reprezentantes husi grupu vulneravel sira hanesan feto iha área rurál, ema ho defisiénsia, sobrevivente hosi konflitu no komunidade LGBTIQ+.

Iha sorumutuk ne’e, membrus Konsellu Ministrus analiza aprezentasaun Sekretáriu Estadu Protesaun Sivíl nian kona-ba impaktu hosi udan boot ne’ebé afeta infraestruturas, hela-fatin no komunidade iha rejiaun barak nasaun ne’e nian iha Tersa (9/1/2024).

Avalia mós resposta emerjénsia hosi autoridades, nune’e mós medida nesesária hodi prevene risku no minimiza impaktu inundasaun iha tempu futuru.